O‘zbekiston prezidenti matbuot xizmati fotosurati
Futbol bo‘yicha O‘zbekiston milliy terma jamoasi CAFA Nations Cup-2025 finalida eronlik raqibini mag‘lub etib, turnir g‘olibiga aylandi. Hal qiluvchi bahs Toshkentdagi Olimpiya shaharchasida barpo etilgan yangi stadionda bo‘lib o‘tdi. Uchrashuvni Markaziy Osiyo Respublikasi Prezidenti Shavkat Mirziyoyev va FIFA rahbari Janni Infantino tomosha qildi, deya xabar beradi davlat rahbari matbuot xizmati.
Finalda O‘zbekiston va Eron milliy jamoalari bahs olib bordi. Asosiy vaqtda gol urilmagach, qo‘shimcha taymlar belgilandi. Ular ham durang bo‘lib, o‘yin penaltilar seriyasiga qarab ketayotgan paytda O‘zbekiston g‘alaba golini kiritdi. 120-daqiqada qanotdan oshirilgan to‘pni Hojiakbar Alijonov boshi bilan raqib darvozasiga yo‘lladi. Natijada O‘zbekiston 1:0 hisobida g‘alaba qozondi va ilk bor faxriy kubokni qo‘lga kiritdi.
Ushbu kubok o‘yinlari jahon chempionatiga chiqqan futbolchilarimiz uchun yaxshi tayyorgarlik vazifasini o‘tadi. Yana bir quvonarli tomoni, milliy terma jamoa Eronga qarshi 13 yillik g‘alabasiz seriyasiga yakun yasaldi. 2023 yilda o‘tkazilgan birinchi shunday musobaqada ham O‘zbekiston finalda aynan Eronga 0:1 hisobida yutqazgan edi.
Endi esa yangi stadionda o‘zbeklar revanshga erishdi. Mamlakat rahbari matbuot xizmati ta’kidlashicha, bunda chuqur ma’no bor: kelajak avlodlar uchun yaratilgan arenalar bugun shon-shuhrat maskaniga aylanib bormoqda.
G‘olib futbolchilarga oltin medallar va kubokni Prezident Shavkat Mirziyoyev topshirdi. Taqdirlash marosimida FIFA rahbari Janni Infantino va boshqa rasmiy shaxslar ham ishtirok etdi.
CAFA Cup final o‘yini oldidan Mirziyoyev va Infantino muzokara o‘tkazib, O‘zbekiston va nufuzli xalqaro tuzilma o‘rtasidagi hamkorlikni yanada kengaytirish masalalarini muhokama qildi.
Mehmon fursatdan foydalanib, respublika rahbarini tarixiy voqea – milliy terma jamoaning JCH-2026 final bosqichiga chiqqani bilan yana bir bor tabrikladi. Bu yutuq mamlakatda amalga oshirilayotgan islohotlar, mutasaddi idoralar tomonidan sportni qo‘llab-quvvatlayotgani samarasi ekani alohida ta’kidlandi.
Uchrashuvda futbolni tashkil etish va boshqarish tizimini takomillashtirish, yosh iste’dodlarni yuzaga chiqarishga ko‘maklashish, murabbiylar, hakamlar, menejerlar, sport shifokorlari va texnik mutaxassislarni xalqaro darajada tayyorlash borasidagi sermahsul hamkorligini yanada kengaytirish masalalari muhokama qilindi.
Mirziyoyev va Infantino Toshkent shahrida FIFAning Markaziy Osiyo mamlakatlari uchun mintaqaviy ofisini ochish yuzasidan kelishib oldi.
Uchrashuv yakunida O‘zbekiston Prezidenti o‘zbek futbolini rivojlantirish va xalqaro maydonda ilgari surishga qo‘shgan shaxsiy hissasi uchun FIFA rahbari Janni Infantinoga davlatimizning yuksak mukofoti – «Do‘stlik» ordenini topshirdi.
ℹ️ CAFA Nations Cup-2025 O‘zbekiston va Tojikistonda bo‘lib o‘tdi. Turnirda sakkizta jamoa ishtirok etdi. Kubok uchun mezbonlardan tashqari Qirg‘iziston, Turkmaniston, Eron, Afg‘oniston, Ummon va Hindiston terma jamoalari kurash olib borishdi.
