eccis.org sayti fotosurati
MDH davlatlari rahbarlari 2030 yilgacha bo‘lgan harbiy hamkorlik konsepsiyasini ma’qulladilar. Tegishli qaror Dushanbeda bo‘lib o‘tgan MDH Davlat rahbarlari kengashining navbatdagi yig‘ilishida qabul qilindi, deya xabar beradi tashkilot ijroiya qo‘mitasi matbuot xizmati.
«MDH davlatlarining ustuvor yo‘nalishlariga muvofiq, harbiy hamkorlik ochiq, bashorat qilinadigan, doimiy ravishda qo‘shilmaslik va uchinchi davlatlarga qarshi qaratilmagan xarakterga ega», — deyiladi bayonotda.
Tashkilotga a’zo davlatlar «xalqaro tinchlik, mintaqaviy barqarorlik va har bir MDH davlatining xavfsiz rivojlanishini ta’minlash uchun» o‘zaro ishonchni mustahkamlash va teng huquqli, yaxshi qo‘shnichilik munosabatlarini, jumladan, boshqa davlatlar va xalqaro tashkilotlar bilan rivojlantirishga kelishib oldilar.
Murojaatda ta’kidlanishicha, harbiy hamkorlikning ma’naviy asosi «1941-1945 yillardagi Ulug‘ Vatan urushi davridagi Buyuk G‘alabaning tarixiy xotirasi, xalqlarimizning mushtarak qahramonona o‘tmishi va bunyodkorlik buguni hisoblanadi».
Konsepsiya MDHga a’zo davlatlar o‘rtasidagi ko‘p tomonlama harbiy hamkorlikning uzluksizligini va uni izchil tizim sifatida yanada rivojlantirishni ta’minlaydi. Unga ko‘ra, Hamdo‘stlik mamlakatlari tashkiliy-huquqiy mexanizmlarni takomillashtiradi, qo‘shma istiqbolli dastur va loyihalarni ishlab chiqadi, «ham an’anaviy, ham yangi aktual sohalarda» hamkorlik qiladi.
«Qurolli kuchlar tarkibida qo‘shma harbiy tizimlarning milliy tuzilmalarini mustahkamlashga alohida e’tibor qaratiladi. Yagona havo hujumidan mudofaa tizimini, qo‘shma aloqa tizimini, RBX holatini kuzatish va baholashning yagona tizimini, yagona radar identifikatsiya tizimini, qurolli kuchlar uchun yagona harbiy geoaxborot tizimini rivojlantirishga ustuvor ahamiyat beriladi, bu esa milliy harbiy kuchlarning jangovar salohiyati va hamkorligi darajasini sezilarli darajada oshiradi», — deyiladi MDH Ijroiya qo‘mitasi matbuot xizmati xabarida.
Bugungi sammit davomida jami 19 ta hujjat imzolandi. Ular orasida hamkorlikning yangi formati — «Mustaqil Davlatlar Hamdo‘stligi plyus»ni yo‘lga qo‘yish to‘g‘risida qaror qabul qilindi.
