ru.pinterest.com sayti fotosurati
Tojikistondagi barcha o‘qituvchilar majburiy harbiy xizmatdan ozod qilindi. Ilgari bu imtiyoz faqat qishloq maktablarida ishlaydigan o‘qituvchilarga tegishli edi. «Aziya-Plyus» nashrining xabar berishicha, «Harbiy majburiyat va harbiy xizmat to‘g‘risida»gi qonunga tegishli o‘zgartirishlar kiritildi.
O‘zgartirishlar parlament tomonidan ma’qullangan. Kuchga kirishi uchun ular Majlisi Milli (parlament yuqori palatasi) vakillari tomonidan tasdiqlanishi kerak, shundan so‘ng hujjatlar prezident tomonidan imzolanadi va ommaviy axborot vositalarida e’lon qilinadi.
Tojikiston Ta’lim va fan vazirining birinchi o‘rinbosari Homid Xoshimzodaning so‘zlariga ko‘ra, o‘zgartirishlar o‘qituvchilarning mavqeini oshirish va ta’lim muassasalarida o‘qituvchilar taqchilligi muammosini hal qilish uchun kiritilmoqda.
Shuni ta’kidlash lozim, o‘qituvchilarning harbiy xizmatdan ozod qilinishi Tojikistonning bir qator hududlarida, jumladan, Dushanbeda kuzgi chaqiruv rejasining muddatidan oldin bajarilishiga ta’sir qilmadi. Bir necha kun oldin Xatlon viloyati rasmiylari rejaning 100% bajarilganini xabar qilishgan edi. Bunday natija «faol targ‘ibot va tashviqot ishlari» bilan izohlangan.
«Aziya-Plyus» ning ta’kidlashicha, o‘qituvchilar yetishmasligi dolzarb muammo bo‘lib qolmoqda. Ta’lim va fan vaziri Rahim Saidzodaning so‘zlariga ko‘ra, garchi bu yil 13 000 talaba universitetlarni o‘qituvchilik kasbi bilan bitirgan bo‘lsada, 2025/2026 o‘quv yili boshida mamlakat maktablarida 3800 dan ortiq o‘qituvchi yetishmayotgani aniqlangan.
Mutaxassislarning fikricha, bu vaziyatning bir qator sabablari bor. O‘qituvchilarni majburiy harbiy xizmatga chaqirishdan tashqari, hukumatning o‘z va’dalarini bajarmayotgani ham bitiruvchilarning o‘z kasbida ishlashni xohlamayotganiga sabab bo‘lmoqda. Masalan, o‘qituvchilar hali ham qonunda nazarda tutilgan yer uchastkalarini olish yoki boshqa imtiyozlarga ega emas.
Ushbu muammoni hal qilish uchun hukumat «O‘qituvchilar maqomi to‘g‘risida»gi qonun loyihasini taklif qildi, u Majlisi namoyandagon (parlament quyi palatasi) tomonidan qabul qilindi. Ushbu hujjat birinchi marta o‘qituvchilarning huquqiy, ijtimoiy va moliyaviy holatini mustahkamlash va ularning qadr-qimmati va huquqlarini himoya qilishga qaratilgan. Xususan, qonunda o‘qituvchilarni maktablardagi shanbalik va mablag‘ yig‘ish ishlariga jalb etish taqiqlanadi.
