seytekstem.edu.kg sayti fotosurati
Bishkekdagi «Seytek STЕM» xususiy maktabida tushlikdan so‘ng, sog‘lig‘ining yomonlashishi sababli 84 kishi, jumladan, to‘rt nafar o‘qituvchi tibbiy yordamga murojaat qilishdi. Bemorlarga dastlabki tashxis qo‘yildi, deb xabar beradi 24.kg nashri Qirg‘iziston poytaxti Davlat sanitariya-epidemiologiya nazorati markaziga tayanib.
Rasmiylarning so‘zlariga ko‘ra, jabrlanganlarning 79 nafari Respublika klinik yuqumli kasalliklar shifoxonasiga olib ketilgan va u yerda tekshiruvdan o‘tkazilgan. O‘n uch bemor mutaxassislar nazorati ostida qolgan, qolganlari esa zarur muolajalardan so‘ng qo‘yib yuborilgan. Yana besh nafar zaharlangan bemor xususiy tibbiyot markazlarida davolangan.
Mutaxassislar ommaviy zaharlanish maktab oshxonasida shaurma (lavash deb ataladigan yupqa nonga o‘ralgan sabzavotlar, souslar va ziravorlar qo‘shilgan go‘shtli taom) iste’mol qilinishi bilan bog‘liqligini aniqlaganlar. Hodisa 31 oktyabr kuni sodir bo‘lgan. Taom maktab oshpazlari tomonidan tayyorlangan.
Kasallikning dastlabki belgilari, jumladan, qusish, diareya, qorin og‘rig‘i va umumiy holsizlik, jabrlanuvchilarda ovqatni iste’mol qilgandan bir necha soat o‘tgach paydo bo‘lgan.
«Mazkur xabar olingandan so‘ng, markaz mutaxassislari darhol maktab oshxonasi va taomlar saqlash xonasini sanitariya-epidemiologiya tekshiruvidan o‘tkazdilar. Ular kerakli oziq-ovqat namunalarini yig‘ishdi, jihozlar va idishlardan kundalik tahlillar olishdi, shuningdek, oziq-ovqat tayyorlashda ishtirok etgan xodimlarni tekshirishdi. Sanitariya me’yorlari va oziq-ovqat mahsulotlarini saqlash sharoitlariga rioya qilinishi tekshirildi», — deb ta’kidladi nazorat organi.
Shu bilan birga, maktab ma’muriyatiga aniqlangan qoidabuzarliklarni tuzatish va to‘liq dezinfeksiya qilish bo‘yicha ko‘rsatmalar berilgan. Muassasa direktoriga qarshi ikkita qoidabuzarlik bayonnomasi tuzilgan, ular 5000 som (57 dollar) va 23000 som (263 dollar) miqdorida jarima solishni nazarda tutdi.
Mutaxassislar hozirda belgilangan tekshiruvlarni o‘tkazishda davom etmoqdalar. Natijalar olingandan so‘ng, ushbu hodisa bo‘yicha yakuniy baho beriladi va amaldagi Qirg‘iziston qonunchiligiga muvofiq mas’ul shaxslarga nisbatan choralar ko‘riladi.
