Ijtimoiy tarmoqdagi fotosurat
O‘zbekiston Jahon savdo tashkilotiga (JST) a’zo bo‘lishga doir barcha muhim masalalar bo‘yicha Rossiya bilan kelishib oldi. Jarayonni yakunlash uchun Tayvan (Xitoy Taybeyi — bu hududning xalqaro tashkilotlarda ishtirok etishda foydalanadigan nomi) bilan muzokaralar olib borish qoldi, deb xabar beradi O‘zbekiston prezidentining JST masalalari bo‘yicha vakili Azizbek Urunov o‘zining LinkedIn (Rossiyada taqiqlangan ijtimoiy tarmoq)dagi akkuantida.
Mulozimning so‘zlariga ko‘ra, Rossiya delegatsiyasi bilan muzokaralar o‘tgan hafta Moskvada bo‘lib o‘tgan. Urunov uchrashuvni samarali deb atadi va so‘nggi tekshiruv va tasdiqni talab qiladigan bir nechta texnik bandlar qolganiga aniqlik kiritdi.
Shu bilan birga, Markaziy Osiyo respublikasi rahbarining vakili rossiyalik hamkasblariga asosiy masalalar bo‘yicha aniqlik kiritgani, shuningdek, jarayon davomida konstruktiv hamkorlik va qo‘llab-quvvatlagani uchun minnatdorchilik bildirdi.
Urunovning so‘zlariga ko‘ra, O‘zbekiston va Rossiya o‘rtasidagi kelishuv shu yilning dekabr oyida Jenevada bo‘lib o‘tadigan JST Bosh kengashi yig‘ilishida rasman imzolanishi kutilmoqda.
«Endi ikki tomonlama muzokaralarni yakunlashimiz uchun faqat Xitoy Taybeyi qoldi», — deb yozadi mulozim.
Uning qo‘shimcha qilishicha, u hozirda Vashingtonda bo‘lib, u yerda Tayvan delegatsiyasi bilan uchrashishni va O‘zbekistonning Jahon savdo tashkilotiga a’zo bo‘lishi uchun ushbu mamlakatning roziligini olishni rejalashtirmoqda.
7 noyabr kuni Urunov va uning jamoasi Kanada va Panama bilan muzokaralarni muvaffaqiyatli yakunladi. Shundan so‘ng, prezident vakilining so‘zlariga ko‘ra, uchta davlat qolgan.
Keyinchalik O‘zbekiston Ekvador bilan ham shunga o‘xshash hujjatlarni imzolagani haqida xabar berildi. Endi, RF bilan asosiy bandlar bo‘yicha kelishib olingandan so‘ng, respublika yakuniy bosqichga o‘tganini aytish mumkin.
ℹ️ O‘zbekiston JSTga a’zo bo‘lish uchun 1994 yili ariza bergan va 2005 yil oktyabr oyida Andijon voqealari ortidan jarayon to‘xtatilgunga qadar ishchi guruhning uchta yig‘ilishi o‘tkazilgan. Mamlakat rasmiylari o‘z qonunchiligini tashkilot talablariga javob beradigan tarzda tuzatishni davom ettirdi va 2017 yili a’zo bo‘lishga oid ishlar qayta boshlandi.
Ma’lumki, O‘zbekiston 2026 yil mart oyida Kamerunda bo‘lib o‘tadigan 14-vazirlar konferensiyasidan oldin JST a’zosi bo‘lishni niyat qilgan.
ℹ️ JST — mamlakatlar o‘rtasidagi savdoni tartibga soluvchi global xalqaro tashkilot. Bitimlar asosini uning a’zolariga ma’lum savdo huquqlarini kafolatlaydigan shartnomalar tashkil etadi. Tashkilotga a’zo bo‘lish uchun xorijiy hamkorlarga savdo to‘siqlarini kamaytirish va mahalliy ishlab chiqaruvchilar uchun proteksionizmdan voz kechishni talab qiladi.
