Vladimir Smirnov fotosurati / TASS
Rossiya maorif organlari Ichki ishlar vazirligiga chet ellik bolalarning ota-onalari tomonidan maktabga qabul qilish uchun berilgan arizalar, shuningdek, bolaning maktabga qabul qilinishini belgilovchi rus tili imtihoni natijalariga oid ma’lumotlarni taqdim etishi shart bo‘ladi. Ushbu protsedura 2026 yil 28 yanvardan kuchga kiradi, deb xabar beradi Rossiya Ta’lim vazirligi matbuot xizmati tegishli qonunga tayanib.
Ushbu jarayon idoralar o‘rtasida ikki tomonlama ma’lumotlar almashinuvini o‘z ichiga oladi. Ichki ishlar vazirligi xorijiy fuqarolarning, shu jumladan nazorat ostidagi shaxslar reyestriga kiritilgan shaxslar bolalarini ro‘yxatdan o‘tkazish yoki ro‘yxatdan chiqarishga oid ma’lumotlarni almashadi, bu esa voyaga yetmaganlarning ta’lim ehtiyojlarini baholash imkonini beradi.
O‘z navbatida, Ta’lim vazirligi va mahalliy maorif organlari migrantlar bolalarining maktablarga qabul qilinishi va aksincha, ta’lim muassasalaridan haydalganiga doir batafsil ma’lumotlar taqdim etadi.
Maqsadli axborot almashish sxemasi allaqachon tegishli davlat idoralari tomonidan ishlab chiqilgan va tasdiqlangani aniqlandi. Tizim ishga tushirilgandan so‘ng, Ta’lim vazirligi rasmiylari mahalliy maorif organlariga metodologik yordam ko‘rsatadilar va idoralararo elektron aloqa resurslari orqali migrantlar bolalari haqidagi shaxsiy ma’lumotlarga kirish huquqini beradilar. Mutaxassislarning fikricha, bu jarayonni soddalashtiradi va uni iloji boricha shaffof qiladi.
Voyaga yetmagan chet el fuqarolari va fuqaroligi bo‘lmagan shaxslar haqidagi ma’lumotlar Rossiya Ichki ishlar vazirligining «ma’lumotlar markazi»dan o‘tkaziladi va ta’lim muassasalari portallarida yangilangandan so‘ng, u huquqni muhofaza qilish organining migratsiya ro‘yxatga olish tizimiga qaytariladi.
Ushbu mexanizm maktabga bormagan bolalar sonini kuzatish imkonini beradi. Ular bilan individual ishlar olib boriladi, deyo ta’kidlaydi Ta’lim vazirligi.
Shuni ta’kidlash joiz, joriy yil oktyabr oyida Inson huquqlari bo‘yicha Prezident kengashi rahbari Valeriy Fadeyev Rossiyada yashovchi yuz minglab migrantlar bolalari maktabga bormayotganiga oid statistikani keltirdi. Mulozim vaziyatni «nomaqbul» deb atadi va konstitutsiya bolalar uchun universal ta’limni nazarda tutgani sababli, rasmiylar bu masalaga katta e’tibor qaratayotganini ta’kidladi.
Yaqinda Rosobrnadzor chet el bolalarining maktabga kirishi uchun o‘tkazilgan rus tili imtihoniga doir ma’lumotlarni e’lon qildi. Ma’lum bo‘lishicha, ota-onalari ta’lim muassasalariga kirish uchun ariza topshirgan chet ellik bolalarning atigi 19 foizi imtihondan o‘tgan.
ℹ️ Rossiya Federatsiyasi Davlat Dumasi (parlamenti) 2024 yil dekabr oyida rus tili imtihonidan muvaffaqiyatli o‘tolmagan migrantlar bolalarining maktablarga qabul qilinishini taqiqlovchi qonunni qabul qilgandi.
Test Rosobrnadzor tomonidan shu yilning 1 aprelidan o‘tkazib kelinmoqda. Baholash formati sinf darajasiga bog‘liq bo‘ladi. Birinchi sinf o‘quvchilari og‘zaki muloqot qobiliyati — gapirish, tinglash va tushunish bo‘yicha sinovdan o‘tkaziladi. Baholash og‘zaki ravishda o‘tkaziladi va lug‘at, grammatika bilimlarini tekshirishni o‘z ichiga oladi. Ikkinchi sinfdan boshlab test yozma topshiriqlarni, xususan, o‘qish va yozish ko‘nikmalarini tekshirishni o‘z ichiga oladi.
Imtihondan tashqari, bolaning ota-onasi maktab ma’muriyatiga barcha kerakli hujjatlarni taqdim etishi shart. Jumladan, bola ota-onasining shaxsini tasdiqlovchi yoki vakilning qonuniy vakolatlarini tasdiqlovchi hujjatlar nusxalari, bola va uning ota-onasini Rossiyada qonuniy yashashini tasdiqlovchi hujjatlar, yuqumli kasalliklar yo‘qligini tasdiqlovchi tibbiy ma’lumotnoma va xorijiy hujjatlarning rus tiliga tegishli ravishda tasdiqlangan tarjimalari kiradi.
