O‘zbekistonda atom elektr stansiyasi (AES) qurilishi loyihasi bo‘yicha jamoatchilik eshituvlari 23 dekabr kuni bo‘lib o‘tadi. Bu haqda respublika Atom energiyasi agentligi (O‘zatom) habar berdi.
Jizzax viloyati, Forish tumani, Bog‘don aholi punkti, 30-son Madaniyat markazida O‘zbekiston Respublikasida atom elektr stansiyasi (AES) qurilishi loyihasi bo‘yicha jamoatchilik eshituvlari bo‘lib o‘tadi. Tadbir Toshkent vaqti bilan soat 11.00 da boshlanadi.
Jamoatchilik eshituvlari Jizzax viloyat hokimligi vakillari, mahalliy aholi, jurnalistlar va xorijiy kuzatuvchilar bilan ochiq muloqot shaklida o‘tkaziladi. Shundan so‘ng ovoz berish o‘tkaziladi.
Eshituvlarning asosiy maqsadi loyihaning atrof-muhitga ta’sirini baholash, jumladan, o‘simlik va hayvonot dunyosining ekologik holati, yer osti suvlari, atmosfera havosi, shuningdek, meteorologik va seysmik parametrlarni muhokama qilishdan iborat bo‘ladi.
«O‘zatom» agentligi loyiha VVER-1000 va RITM-200N reaktorlaridan iborat atom elektr stansiyasi (AES) qurilishini o‘z ichiga olishini ta’kidladi. Stansiyaning umumiy quvvati 2110 MVtni tashkil etadi va yiliga 16-17 milliard kVt/soat elektr energiyasi ishlab chiqaradi. AES O‘zbekiston energiya balansining 12-15 foizini tashkil qiladi. Uning ishlash muddati 60 yil deb taxmin qilinmoqda.
AES qurilish jarayonida 13 000 ga yaqin, undan foydalanish jarayonida esa 2000 ga yaqin odam ish bilan ta’minlanadi.
O‘zbekistondagi AES qurilishi loyihasining bosh pudratchisi Rosatom davlat korporatsiyasining muhandislik bo‘limi bo‘lgan «Atomstroyeksport» bo‘lib, u dunyodagi eng yirik atom elektr stansiyalarini qurish bo‘yicha eksport shartnomalari portfeliga ega.
Loyiha bo‘yicha takliflarni info@uzatom.uz va direksiyaaes@uzatom.uz. elektron pochta manzillariga yuborish mumkin.
«Jamoatchilik vakillarini va barcha manfaatdor tomonlarni jamoatchilik eshituvlarida faol ishtirok etishga taklif qilamiz!», — deyiladi e’londa.
Ayni paytda, O‘zbekistonda kichik atom elektr stansiyasi (KAES) qurilishiga tayyorgarlik ishlari boshlangan. Uni Jizzax viloyatining Forish tumanidagi Tuzkon ko‘li yaqinida qurish rejalashtirilgan. U yerda har biri 55 MVt quvvatga ega oltita reaktor o‘rnatiladi, umumiy quvvati 330 MVt. Reaktorlar xavfsizlik talablari va yadro energiyasi qoidalarini hisobga olgan holda bitta joyda joylashgan bo‘ladi. Birinchi reaktor 2029 yili ishga tushirilishi kutilmoqda.
«Rosatom» bilan kichik atom elektr stansiyasini loyihalash, yetkazib berish va qurish bo‘yicha yangi shartnoma — 2024 yil 27 may kuni Toshkentda Rossiya prezidenti Vladimir Putinning davlat tashrifi chog‘ida imzolangandi. Shu munosabat bilan tomonlar 2018 yil 7 sentyabrda tasdiqlangan ikki mamlakat hukumatlari o‘rtasidagi O‘zbekistonda atom elektr stansiyasini qurish bo‘yicha hamkorlik kelishuviga o‘zgartirish kiritish to‘g‘risidagi protokolni imzoladilar.
