26 noyabr kechasi Tojikiston-Afg‘oniston chegarasida sodir bo‘lgan qurolli hodisada uch nafar Xitoy fuqarosi halok bo‘lgan. Bu haqda Tojikiston Tashqi ishlar vazirligi matbuot xizmati xabar berdi.
«Shoxin SM» tog‘-kon kompaniyasi xodimlari bo‘lgan xitoylik fuqarolarga hujum Xatlon viloyatining Shamsiddin Shoxin tumanidagi «Yol» chegara otryadining 1-«Istiklol» chegara posti hududida sodir bo‘lgan. Afg‘oniston hududidagi hujumchilar o‘qotar qurollar va granatalar biriktirilgan dronlardan foydalanishgan.
TIV Afg‘onistondagi jinoiy guruhlar «tojik tomonining Tojikiston va Afg‘oniston chegara hududlarida xavfsizlikni saqlash va o‘zaro manfaatli hamkorlik muhitini yaratish bo‘yicha izchil sa’y-harakatlariga qaramay», vaziyatni beqarorlashtirishga urinayotganini ta’kidlaydi.
Tojikiston tomoni mavjud vaziyatdan chuqur xavotir bildiradi, bunday harakatlarni qat’iy qoralaydi va Afg‘oniston rasmiylarini davlat chegarasi bo‘ylab barqarorlik va xavfsizlikni ta’minlash uchun samarali choralar ko‘rishga chaqiradi. Afg‘oniston tomoni hali bu voqeaga izoh bermagan.
Shu bilan birga, Ariana News xabariga ko‘ra, Afg‘onistonning Badaxshon viloyati gubernatori boshchiligidagi delegatsiya chegara bilan bog‘liq muammolarni hal qilish uchun Tojikistonga safar qilgan. Bu haqda Afg‘oniston Ichki ishlar vazirligi ma’lum qildi. Tashrifning aniq sanasi ko‘rsatilmagan.
Avvalroq, Tojikiston telekanalida Milliy xavfsizlik davlat qo‘mitasi (MXDQ) tomonidan tayyorlangan afg‘on giyohvand moddalar kontrabandachilari guruhining yo‘q qilinishi haqida reportaj namoyish etilgan edi. 20 noyabr kuni bo‘lib o‘tgan operatsiya davomida kontrabandachilarga granatalar tashlash uchun dron ishlatilgan. Natijada ikki kontrabandachi o‘ldirilgan va ularning yonidan 116 ta giyohvand moddalar paketi topilgan. Milliy xavfsizlik davlat qo‘mitasi «bu mamlakat chegara xizmati tarixida birinchi marta mahalliy ishlab chiqarilgan uchuvchisiz uchish apparatlaridan foydalangan holda operatsiya o‘tkazilganini» ta’kidladi.
«Aziya-plyus» xabar berishicha, so‘nggi olti oy ichida Tojikiston-Afg‘oniston chegarasida Tojikiston xavfsizlik kuchlari va afg‘on giyohvand moddalar savdogarlari o‘rtasida o‘nta qurolli to‘qnashuv sodir bo‘lgan. Ushbu hodisalar paytida to‘rt nafar afg‘on fuqarosi halok bo‘lgan. Hodisalarning aksariyati Afg‘onistonning Badaxshon viloyati bilan chegaradosh hududlarda sodir bo‘lgan.
Norasmiy ma’lumotlarga ko‘ra, noxush voqealardan biri shu yilning yoz oxirida Shahri-Buzurg tumanida sodir bo‘lgan. Mojaro 24 avgust kuni Xitoy konchilik kompaniyalari hududdagi faoliyatini kengaytirishi oqibatida Amudaryo sohilining bir qismini vayron bo‘lgan. Konchilik bilan shug‘ullanayotgan afg‘onlar tojik chegarachilarining qattiq qarshiligiga duch kelishgan. Otishma sodir bo‘lgan, natijada bir afg‘on halok bo‘lgan va yana to‘rt kishi yaralangan.
Hodisadan so‘ng, Afg‘oniston va Tojikiston vakillari muzokaralar olib borishdi va bir-birini qurolli guruhlarni qo‘llab-quvvatlash va o‘qitishda ayblashdi. Afg‘oniston tomonining ma’lumotlariga ko‘ra, Tojikiston «Tolibon»*ning 350 nafar muxolifini tayrlamoqda, tojik tomoni esa Afg‘oniston jangarilarga boshpana berayotganini ta’kidlagan.
*Ko‘pgina mamlakatlarda terrorchi sifatida tan olingan va taqiqlangan tashkilot.
