Altinbek Abduvapov. kaktus.media sayti fotosurati
Bishkekning Lenin tuman sudi 2024 yil dekabr oyida korruptsiyada gumon qilinib hibsga olingan Qirg‘iziston Davlat soliq xizmati (DSX)ning sobiq raisi Altinbek Abduvapovga hukm chiqardi.
24.kg nashrining xabariga ko‘ra, Abduvapov va uning hamkasbi rahbar o‘rinbosari Islombek Qidirgichov Qirg‘iziston Jinoyat kodeksining 245-moddasi («Lavozimni suiiste'mol qilish») bo‘yicha aybdor deb topilgan.
Sud ularga jarima solgan: Abduvapov davlatga 400 000 som (taxminan 4600 dollar), Qidirgichov esa 300 000 som (3400 dollar) to‘lashi kerak. Ikkalasi ham davlat lavozimlarida ishlashdan chetlatilgan va maxsus unvonlar, mansab unvonlari va davlat mukofotlaridan mahrum qilingan.
Mazkur ish bo‘yicha uchinchi sudlanuvchi T.A. 245 va 267-moddalar («Qurol va o‘q-dorilarning noqonuniy savdosi») bo‘yicha jinoyatlarni sodir etganlikda aybdor deb topilgan va 330 000 som (3800 dollar) miqdorida jarimaga tortilgan. U muayyan lavozimlarni egallash yoki muayyan faoliyat bilan shug‘ullanish huquqidan mahrum qilingan.
Hukm 2025 yil 25 dekabrda chiqarilgan. Abduvapov va Qidirgichovga nisbatan sudgacha bo‘lgan hibsga olish chorasi hukm kuchga kirgunga qadar chet elga chiqishni taqiqlash bilan o‘zgartirilgan. T.A. qamoqxonada qolgan.
ℹ️ Abduvapov va Qidirgichov 2024 yil 6 dekabrda hibsga olingan. Bundan sal oldin, 3 dekabr kuni alkogol importchilari va ishlab chiqaruvchilariga eski aktsiz markalarini yangilash vazifasi qo‘yilgan. Keyinchalik, Milliy xavfsizlik davlat qo‘mitasi (MXDQ) fiskal agentlikning tuman bo‘limlarida tintuv o‘tkazgan va mamlakatga aktsiz to‘lanadigan tovarlarni yetkazib berish bilan bog‘liq qonunbuzarliklar yashirilganini aniqlagan. Bir nechta soliq xodimlari so‘roq qilish uchun olib ketilgan va keyinchalik ular hibsga olingan.
O‘shanda Davlat xavfsizlik xizmati raisi Kamchibek Tashiyev amaldorlar elektron tovar-transport jo‘natmalaridan foydalanish bilan bog‘liq korruptsiya sxemasini yaratganliklarini ma'lum qilgandi. Uning so‘zlariga ko‘ra, bu harakatlar davlatga 3,2 milliard som (36,8 million dollar) zarar keltirgan.
Keyinchalik, 2025 yil iyul oyida Tashiyev Abduvapovga tegishli 55 million dollarlik aktivlar topilgani haqida xabar bergan. U soliq organlarida 10 yildan ortiq ishlaganini va biznesga ega emasligini ta'kidlab, Davlat xavfsizlik xizmati rahbari amaldor qanday qilib bunday summani to‘plaganini so‘ragan.
«Uning qo‘l ostidagi xodimlari unga oyiga 50 000 dan 100 000 dollargacha pora berganliklarini aytishmoqda. Biz undan hamma narsani musodara qilamiz va u sudda javob beradi. Bundan buyon Altinbek dunyodagi eng kambag‘al odamlardan biri bo‘ladi. Endi avvalgidek sudga pul berib, ozod bo‘lib, yana jipda yura olmaysiz. U kunlar o‘tib ketdi», — degandi Tashiyev.
