marinetraffic.com sayti fotosurati
Turkmaniston qirg‘oq xizmatlari Kaspiy dengizida cho‘kib ketayotgan Eronning Rona yuk tashuvchi kemasi ekipajini qutqardi, deb xabar beradi Turkmaniston Tashqi ishlar vazirligi (TIV) matbuot xizmati.
Hodisa 14 yanvar kuni sodir bo‘lgan, o‘shanda Eronning Amirobod portidan Rossiyaning Astraxan shahriga ketayotgan kema SOS signalini yuborgan.
«O‘z vaqtida ko‘rilgan choralar natijasida bortdagi barcha 14 kishi qutqarildi. Dastlabki ma'lumotlarga ko‘ra, ular Eron va Hindiston fuqarolari bo‘lgan», — deyiladi bayonotda.
Turkmen.news xabariga ko‘ra, ilgari Oban deb nomlangan yuk tashuvchi kema 12 yanvar kuni jo‘nab ketgan va 16 yanvar kuni manziliga yetib borishi kerak bo‘lgan. Biroq, 14 yanvar kuni bortda suv sizib kirishi tufayli favqulodda holat yuz bergan. Falokat signali yuborilganidan ko‘p o‘tmay, yuk kemasi cho‘ka boshlagan. Hodisaning texnik tafsilotlari hali ham noma'lum.
OAV xabar berishicha, Oban nomli yuk tashuvchi kema muntazam ravishda Eronning Amirobod va Anzali portlari hamda Rossiyaning Astraxan, Maxachkala va Azov portlari o‘rtasida suzib yurgan. CNN bu yo‘nalishni Erondan Rossiyaga dengiz orqali qurollarini yetkazib berish ehtimoli bilan bog‘laydi.
ℹ️ Cho‘kib ketgan yuk tashuvchi kema 1983 yilda qurilgan. Uning uzunligi 113,98 metr va kengligi 13,21 metr bo‘lgan.
