gazeta.ru sayti fotosurati
2026 yil boshiga kelib, Tojikistonda 5000 dan ortiq sehrgarlar, folbinlar va «sayyoh mullalar» (diniy ta'limotga ega bo‘lmagan kimsalar) ro‘yxatga olingan. Ular maxsus ma'lumotlar bazasiga kiritilgan, chunki Ichki ishlar vazirligining ma'lumotlariga ko‘ra, «sehrli kuch sohiblari» fuqarolarni terrorizm va ekstremizmga undamoqda. Bu haqda Ichki ishlar vaziri Ramazon Rahimzoda ma'lum qildi, deb xabar beradi «Aziya-Plyus» nashri.
Vazirning so‘zlariga ko‘ra, bunday vaziyat xavotir o‘yg‘otadi.
«Ko‘p odamlar hali ham sehr-joduga, odamlarni terrorizm va ekstremizmga undaydigan sehrgar va «sayyoh mullalar»ga ishonishadi», — dedi vazirlik rahbari.
Tojikistonda sehrgar va folbinlar ro‘yxati 2024 yildan beri yuritib kelinadi. Bundan tashqari, reyestrga nafaqat shu yo‘l bilan pul topadiganlar, balki ularning mijozlari ham kiritiladi.
Rahimzoda ko‘pgina tojikistonliklar Umraga borishini ta'kidladi. Masalan, o‘tgan yili ziyoratchilar soni 7500 dan oshgan. Bundan tashqari, ular ko‘pincha safar uchun bank kreditlarini olishadi. Biroq, Islomda sehr va shunga o‘xshash hodisalar gunoh deb hisoblanishiga qaramay, fuqarolar jodu va folbinlikka ishonishda davom etmoqdalar.
Din masalalari bo‘yicha mutaxassis Rustam Azizining fikricha, aholi hayotdagi muammolarni, masalan, sog‘lig‘ining yomonlashuvi yoki oilaviy, biznes muammolarini hal qilish uchun g‘ayb kuchlaridan madad olishga intiladi.
«Ularning ilmiy va diniy tushunchasi past darajada bo‘lgani uchun, shunday yo‘lni tanlaydilar», — deb ta'kidlaydi mutaxassis.
Bunday hollarda psixologlarga murojaat qilish mantiqan to‘g‘ri bo‘ladi, ammo tojiklar ularga ishonmaydilar. Biroq, Azizining ta'kidlashicha, buning sabablari bor, chunki sovet an'analariga asoslangan mahalliy psixologiya maktabi psixologik masalalarni fiziologik nuqtai nazardan baholaydi.
«Aziya-Plyus» respublikada sehr-jodu va folbinlik uchun javobgarlik borligini eslatadi. Xususan, sehrgarlik bilan shug‘ullangan shaxslarga hisob ko‘rsatgichining 100 baravarida — 7800 somoni (826 dollar) ma'muriy jarima yoki 15 kungacha qamoq jazosi ko‘zda tutilgan.
Takroran qoidani buzgan shaxslar jinoiy javobgarlikka tortiladi. Kodeksning tegishli moddasiga ko‘ra, sehrgarlar kattaroq jarimaga tortiladi — 150 000 somonigacha (taxminan 16 000 dollar). Maksimal jazo bir yildan ikki yilgacha qamoq jazosini nazarda tutadi.
