«Nasaf» FK. «Nasaf» FK fotosurati
Turkmaniston va O‘zbekiston futbol klublari OFK Chempionlar ligasi-2 guruh bosqichining to‘rtinchi turidagi o‘z uchrashuvlarida g‘alaba qozondi. Turkmanistonning «Arkadag» jamoasi o‘z maydonida Eronning «Gol Gohar» klubini 1:0 hisobida mag‘lub etdi, O‘zbekistonning «Nasaf» jamoasi esa «Al-Kuvayt» ustidan irodali g‘alabaga erishdi — 3:2.
«Arkadag» 4 noyabr kuni Eron jamoasini qabul qildi. Uchrashuvdagi yagona golni 77-daqiqada Shanazar Tirkishovning uzatmasidan keyin Axmet Atayev kiritdi. Bu g‘alaba tufayli turkman klubi ochkolarini yettitaga yetkazib, B guruhidagi ikkinchi o‘rnini saqlab qoldi. Birinchi o‘rinda BAAning «Al-Jazira» jamoasi 10 ochko bilan bormoqda. Bahraynning «Al-Muharraq» klubi uch, «Gol Gohar» esa ikki ochkoga ega.
Uchrashuv oldidan vizalar bilan bog‘liq mojaro yuzaga keldi. «Gol Gohar»ning uch nafar futbolchisi vizalar berilmagani sababli Turkmanistonga o‘z vaqtida kira olmadi. Eurasia Football xabariga ko‘ra, gap Siamak Nemati, Muhammadhusayn Jamali va Mahan Afruziyan haqida bormoqda. Eron jamoasi bosh murabbiyi Mehdi Rahmati yuz bergan holatdan hayratda ekanini bildirdi. «Farg‘ona» ma’lumotlariga ko‘ra, oxir-oqibat futbolchilarga vizalar berilgan. Jamoaning yana to‘qqiz nafar futbolchisi esa jarohatlar va boshqa sabablarga ko‘ra uchrashuvga bora olmagan.
O‘zbekistonning «Nasaf» jamoasi Quvaytda g‘alaba qozondi, garchi birinchi bo‘limdan keyin 0:2 hisobida ortda borayotgan bo‘lsa-da. Yassin Henissi penaltidan hisobni ochdi, Muhammad Furayh esa mezbonlarning ustunligini ikki karra oshirdi. Tanaffusdan keyin Bobir Abdiholiqov 57 va 67-daqiqalarda gol urib, dubl qayd etdi. 81-daqiqada Oybek Rustamov g‘alaba golini kiritdi.
Ro‘ziqul Berdiyev shogirdlari uchun bu g‘alaba joriy musobaqadagi ilk g‘alaba bo‘ldi. Avvalgi turda «Nasaf» xuddi shu «Al-Kuvayt» jamoasiga o‘z maydonida 0:1 hisobida mag‘lub bo‘lgandi. Endi Qarshi klubi to‘rt ochko bilan A guruhida uchinchi o‘rinda bormoqda. BAAning «Al-Vahda» jamoasi to‘qqiz ochko bilan peshqadamlik qilmoqda, «Al-Kuvayt» esa olti ochko bilan ikkinchi o‘rinda. Bahraynning «Al-Xolidiya» klubi ham to‘rt ochko to‘plagan, ammo qo‘shimcha ko‘rsatkichlar bo‘yicha «Nasaf»dan ortda.
Beshinchi turda, 25 noyabr kuni, «Arkadag» safarda «Al-Muharraq» bilan o‘ynaydi, «Nasaf» esa «Al-Xolidiya»ni qabul qiladi. Pley-off bosqichiga har bir guruhdan eng yaxshi ikkita jamoa yo‘l oladi.
