fintech-retail.com sayti fotosurati
O‘zbekiston prezidenti Shavkat Mirziyoyev banklarning texnologik imkoniyatlarini kengaytirish, raqamli xizmatlar ulushini oshirish bo‘yicha topshiriq berdi. Bunday chora-tadbirlar respublikani moliyaviy texnologiyalarning mintaqaviy markaziga aylantirishga yordam beradi. Tegishli reja va tashabbuslar 10 sentyabr kuni ushbu sohani rivojlantirishga bag‘ishlangan yig‘ilishda muhokama qilindi, deb xabar beradi Markaziy Osiyo davlati rahbari matbuot xizmati.
Sohada muvaffaqiyat mezonlarini aniqlash va boshqarish maqsadida Markaziy bankda Fintex ofisi faoliyatini yo‘lga qo‘yish bo‘yicha vazifalar belgilandi. Startaplar akseleratsiyasi, yangi g‘oyalar va investitsiyalarga sharoit yaratish uchun innovatsion xab tashkil qilinishi ma’qullandi.
Yaqinda tadbirkorlar bilan muloqot chog‘ida prezident startaplarni, open banking tizimini joriy etish va fintexni rivojlantirish bo‘yicha besh yillik strategiya yaratishni qo‘llab-quvvatlashini ma’lum qilgandi.
Mutasaddilarning so‘zlariga ko‘ra, bu boradagi ishlar olib borilmoqda. Shunday qilib, strategiyani puxta ishlab chiqish uchun, avvalo, me’yoriy-huquqiy baza, moliyaviy texnologiyalarning hozirgi holati, infratuzilma va kadrlar masalasi tahlil qilinmoqda. Singapurlik ekspertlar jalb etilib, xalqaro tajriba o‘rganilmoqda.
Shu asosda bu sohadagi milliy tamoyillar shakllantiriladi, institutsional arxitektura va idoralararo hamkorlik tartibi belgilanadi. Yakuniy maqsad barqaror, inklyuziv va raqobatbardosh moliyaviy xizmatlar ekotizimini yaratishdir.
Bugungi kunda moliya bozorini sun’iy intellekt va blokcheyn texnologiyalarisiz rivojlantirib bo‘lmaydi. Tahlillarga ko‘ra, bular orqali banklar daromadini 20 foizga, moliyaviy xizmatlar hajmini 30 foizga oshirib, xavflarni 15 foizga kamaytirish mumkin.
Majlisda ta’kidlanishicha, bugungi kunda dunyoda moliyaviy texnologiyalar bozori tez sur’atda rivojlanyapti. Uning hajmi bu yil 300 milliard dollardan, 2030 yilga borib, 600 milliard dollardan oshishi kutilmoqda.
O‘zbekiston erishgan yutuqlar ham qayd etildi. Agar 2018 yilda FinTech korxonalari 24 ta bo‘lgan bo‘lsa, hozirgi kunda 103 taga yetgan. Joriy yili mahalliy korxonalar tomonidan 260 million dollardan ziyod xorijiy investitsiya jalb qilingan. Bu ko‘rsatkich o‘tgan yilga nisbatan 4 barobar ko‘p.
