O‘zbekiston prezidenti matbuot xizmati fotosurati
O‘zbekiston prezidenti Shavkat Mirziyoyev Nyu-Yorkda BMT Bosh Assambleyasining 80-sessiyasida so‘zlagan nutqida Markaziy Osiyoda (MO) yopiq chegaralar, hal etilmagan nizolar, mojarolar davri o‘tmishda qolib ketganini ta’kidladi. Davlat rahbarining nutqi uning saytida e’lon qilindi.
Davlat rahbari bundan sakkiz yil avval mana shu yuksak minbardan turib, Markaziy Osiyoni tinchlik, yaxshi qo‘shnichilik va sheriklik makoniga aylantirish bo‘yicha qat’iy qaror qilinganini eslatib o‘tdi.
«Bugun chuqur mamnuniyat bilan ta’kidlash mumkin: biz bu strategik maqsadga erishdik», — dedi Mirziyoyev.
U so‘nggi yillarda mintaqada o‘zaro savdo, investitsiyalar va transport tashuvlari hajmi besh barobargacha ko‘paygani, qo‘shma investitsiya jamg‘armalari, chegara hududlarida savdo va sanoat zonalari tashkil etilgani, yirik infratuzilma loyihalari amalga oshirilayotganini ta’kidladi. Markaziy Osiyo davlat rahbarlari Maslahat uchrashuvlari mintaqaviy integratsiyani chuqurlashtirish yo‘lida samarali mexanizmga aylandi.
O‘zbekiston prezidenti bugungi kunda Yangi Markaziy Osiyoni shakllantirish jarayoni boshlanganini, mintaqa o‘zining hamjihatligi, barqarorligi, o‘ziga xosligi bilan xalqaro munosabatlar tizimida alohida subyekt sifatida tobora mustahkam o‘rin egallayotganini ta’kidladi.
Mazkur omilni hisobga olgan holda davlat rahbari BMT tuzilmalari bilan mintaqada qator yangi loyiha va dasturlarni amalga oshirishni, jumladan, EKOSOS va YUNKTAD shafeligida Markaziy Osiyo davlatlarining iqtisodiy taraqqiyoti masalalariga bag‘ishlangan xalqaro forum o‘tkazish, YUNIDO bilan sanoatda «yashil» texnologiyalar mintaqaviy xabini tashkil etish, mintaqada suv resurslaridan oqilona foydalanish, «yashil» makon barpo etish hamda demografik barqarorlikka erishish bo‘yicha dasturlarni qabul qilishni taklif qildi.
Ayniqsa, Afg‘onistondagi beqarorlikni hisobga olinsa, xavfsizlik dolzarb masala bo‘lib qolmoqda. O‘zbekiston prezidenti xalqaro hamjamiyatni afg‘on xalqining tinch va xavfsiz hayotga bo‘lgan intilishlarini qo‘llab-quvvatlashga chaqirib, mamlakat yakkalanib qolmasligi muhimligini ta’kidladi. Mirziyoyev qo‘shni davlat hududi orqali xalqaro transport va energetika koridorlarini rivojlantirish bo‘yicha BMTning alohida rezolyutsiyasini qabul qilishni taklif qildi.
Ushbu mavzuni davom ettirar ekan, Prezident Global aksilterror strategiyasining Markaziy Osiyodagi samaradorligini ta’kidladi. Shuningdek, u BMTning Terrorizmga qarshi kurash boshqarmasi bilan hamkorlikda tuzilgan Reabilitatsiya va qayta integratsiya masalalari bo‘yicha Mintaqaviy Kengashni Xalqaro kompetensiyalar markaziga aylantirishni taklif qildi. Mirziyoyev Terrorizmga qarshi kurash boshqarmasining mintaqaviy ofisini O‘zbekistonda ochish uchun zarur sharoit yaratishga tayyorligini bildirdi.
Prezident iqlim o‘zgarishi muammosiga alohida to‘xtalib, Orol dengizining qurishi salbiy oqibatlarini ta’kidladi. Unga ko‘ra, hududda ekotizimni tiklash bo‘yicha faol ishlar olib borilmoqda. So‘nggi yillarda dengizning qurigan tubida 2 million gektar maydonda sho‘rga chidamli cho‘l o‘simliklari ekildi. 2030 yilgacha ushbu hududning 80 foiz qismida yashil qoplamalar hosil qilish rejalashtirilgan.
Suv resurslarining taqchilligi muammosiga to‘xtalar ekan, Prezident O‘zbekistonda Suvni tejash bo‘yicha butunjahon forumini o‘tkazish rejalashtirilganini ta’kidladi. Mazkur anjuman yakunlari bo‘yicha Suv inqirozini barqaror taraqqiyot uchun jiddiy tahdid sifatida belgilash va bu borada global darajada innovatsiya texnologiyalarini joriy etish uchun alohida «yo‘l xaritasi»ni qabul qilish mo‘ljallanmoqda.
