«Nasaf»-«Al-Hilol» o‘yinidan lavha. «Nasaf» matbuot xizmati fotosurati
Qarshining «Nasaf» jamoasi Osiyo futbol konfederatsiyasi (OFK) chempionlar ligasi guruh bosqichi 2-turida Saudiya Arabistonining «Al-Hilol» jamoasiga 2:3 hisobida imkoniyatni boy berdi.
Birinchi turda «Nasaf» Saudiya Arabistonining boshqa bir klubi «Al-Ahli» bilan mehmonda maydonga tushdi va 2:4 hisobida mag‘lub bo‘ldi. Bu safargi o‘yin Qarshida bo‘lib o‘tdi, biroq mutaxassislarning fikricha, bu hal qiluvchi omil bo‘lmagan: «Al-Hilol» Osiyoning eng qimmat klubi sanaladi va tarkib qiymati bo‘yicha «Nasaf» dan 20 baravar qimmat turadi.
Ikkinchi daqiqada mehmonlar Abduvohid Ne’matov darvozasini ishg‘ol qilishdi, ammo gol inobatga olinmadi. Saudiyaliklar pressingda davom etishdi va 21-daqiqada Sergey Milinkovich-Savich hisobni ochdi. Biroq oradan besh daqiqa o‘tib Sardor Baxromov hisobni tenglashtirdi. Birinchi bo‘lim oxirida Teo Ernandes «Al-Hilol»ni yana oldinga olib chiqdi. 60-daqiqada Javohir Sidiqov uzoq masofadan chiroyli zarba yo‘llab, hisobni tikladi, ammo mezbonlar durangni ushlab turmadi: 79-daqiqada Markos Leandro mehmonlarga g‘alaba keltirgan golga mualliflik qildi.
Ikki turdan keyin «Al-Hilol» olti ochko bilan o‘z guruhida peshqadamlik qilayotgan bo‘lsa, «Nasaf» nol ochko bilan turnir jadvalining so‘nggi pog‘onasida bormoqda.
Navbatdagi turda, 20 oktyabr kuni «Nasaf» safarda BAAning «Shabab Al-Ahli» klubiga qarshi bahs olib boradi.
Bundan tashqari, 30 sentyabr va 1 oktyabr kunlari Osiyo Chempionlar Ligasi 2-guruh bosqichining 2-tur o‘yinlari bo‘lib o‘tadi. Ushbu turnirda «Andijon», Dushanbening «Istiqlol», Turkmanistonning «Ahal» va «Arkadag» jamoalari o‘zaro bahs olib borishadi.
