daryo.uz sayti fotosurati
O‘zbekistonda yopiq sud muhokamasida ko‘rib chiqilayotgan ma’lumotlar va tafsilotlarni oshkor qilganlik uchun jinoiy javobgarlik joriy etildi. Eng yuqori jazo uch yilgacha qamoq jazosi. Prezident Shavkat Mirziyoyev tomonidan 26 sentyabr kuni imzolangan tegishli qonun kuchga kirdi, deb yozadi «Gazeta.uz».
Hujjatda amaldagi qonunchilikka bir qator o‘zgartirishlar kiritilgan. Xususan, Jinoyat-protsessual kodeksiga yopiq sud muhokamasi ishtirokchilari sudning maxsus ruxsatisiz sud majlisida taqdim etilgan ma’lumotlarni oshkor etmaslik borasida ogohlantirilishini nazarda tutuvchi 402-1-modda qo‘shilgan. Maxfiylikni saqlashga majbur bo‘lgan shaxslar rasmiylarga yozma tilxat beradilar.
Shu bilan birga, Jinoyat kodeksining 239-moddasiga «yopiq sud muhokamasi» atamasi kiritilgan. Endi u shunday deyiladi: «Surishtiruv, dastlabki tergov yoki yopiq sud majlisi ma’lumotlarini oshkor qilish».
Qoidabuzarlar 50 bazaviy hisoblash miqdori — 20,6 million so‘m (1700 AQSH dollari) miqdorida jarima, uch yilgacha axloq tuzatish ishlari, bir yildan uch yilgacha ozodlikni cheklash yoki uch yilgacha ozodlikdan mahrum qilish bilan jazolanadi.
O‘zbekiston Respublikasi Oliy Majlisi Qonunchilik palatasi tomonidan joriy yil 22 aprelda qabul qilingan va 28 mayda Senat tomonidan ma’qullangan yangi qonunga kiritilgan o‘zgartishlar inson huquq va erkinliklari, shaxsiy hayoti, shaxsiy va oilaviy sirlari, sha’ni va qadr-qimmatini himoya qilishni ta’minlashga qaratilgani ta’kidlangan.
Fevral oyida qonun loyihasi parlamentda muhokama qilinayotganda Respublika Oliy sudi raisi o‘rinbosari Shuhrat Polvanov mazkur hujjat amaldagi sud amaliyotidagi muammolar tufayli ishlab chiqilganini ta’kidlagan edi. Unga ko‘ra, Fuqarolik protsessual, Ma’muriy protsessual kodekslar va boshqa me’yoriy hujjatlarda davlat sirlari yoki qonun bilan qo‘riqlanadigan boshqa ma’lumotlarni himoya qilish zarur bo‘lsa, sud majlislarini yopiq eshiklar ostida o‘tkazishga ruxsat beruvchi qoidalar mavjud. Biroq, bu kodekslar yopiq sud majlislarida ish holatlarini muhokama qilishda maxfiylikni saqlash majburiyatlarini belgilamagan.
Oliy sud vakili, shuningdek, qonun loyihasi boshqa mamlakatlar tajribasidan kelib chiqqan holda ishlab chiqilganini alohida ta’kidladi. U Qirg‘iziston, Qozog‘iston va Singapurni misol qilib keltirdi. Oxirgi mamlakatda, deydi rasmiy, bunday qoidabuzarlik uchun 5000 dollar jarima yoki 12 oygacha qamoq jazosi nazarda tutilgan.
