autostrada.uz sayti fotosurati
Joriy yilning yozgi uch oy ichida O‘zbekistonda 167 ming yo‘l harakati qoidabuzarliklari qayd etilgan bo‘lib, bu o‘tgan yilning shu davriga nisbatan 58 foizga kam, o‘shanda bu ko‘rsatkich 285 mingtani tashkil qilgandi. Rasmiylar ijobiy dinamikani mamlakatda 1 iyundan boshlab jarima ballarini hisoblash tizimi joriy etilgani bilan bog‘lamoqda, deb yozadi UzNews.uz Respublika IIV Jamoat xavfsizligi departamentiga tayanib.
Rasmiy statistik ma’lumotlarga ko‘ra, 2025 yilning iyun-avgust oylarida 60 mingdan ortiq haydovchi jarima balliga ega bo‘lgan. Shu bilan birga, hisobot davrida bor-yo‘g‘i to‘rtta avtoulovchining har biri 5 balldan to‘plagan.
Umuman olganda, quyidagi ma’lumotlar qayd etilgan:
✅ 4 ballgacha 14 nafar;
✅ 3 ballgacha 129 nafar;
✅ 2 ballgacha 4976 nafar;
✅ 1 ballgacha 63974 nafarni tashkil etgan
Qayd etilishicha, 9 mln 325 ming nafardan ortiq haydovchi umuman jarima balli olmagan.
Yo‘l-transport hodisalari soni bo‘yicha ham ijobiy tendensiya kuzatilmoqda. O‘tgan yozda haydovchilarning aybi bilan 531 ta YTH sodir etilgan bo‘lsa, joriy yilning uch hisobot oyida 338 ta hodisa sodir bo‘lgan. Ya’ni bu ko‘rsatkich 36 foizga kamaygan.
Shunday qilib, ko‘rilgan chora-tadbirlar yo‘llarda yo‘l harakati qoidalari buzilishi va baxtsiz hodisalar sonining sezilarli darajada kamayishiga olib keldi, deb ta’kidlaydi IIV Jamoat xavfsizligi departamenti.
O‘zbekiston prezidenti Shavkat Mirziyoyev 2025 yil fevral oyida «Yo‘l harakati qoidalarini buzganlarga jarima balli hisoblash to‘g‘risida»gi qonunni imzolagan edi. Hujjatga ko‘ra, yil davomida 12 ball to‘plansa, fuqaro avtomashinani boshqarish huquqidan mahrum bo‘ladi. Qayd etilishicha, ballar Ma’muriy yoki Jinoyat Kodekslarida nazarda tutilgan asosiy jazo choralari bilan qo‘llaniladigan qo‘shimcha jazo hisoblanadi.
