O‘zbekiston prezidenti matbuot xizmati fotosurati
Nyu-Yorkda BMT Bosh Assambleyasining 80-sessiyasida ishtirok etayotgan O‘zbekiston prezidenti Shavkat Mirziyoyev amerikalik ishbilarmonlar bilan davra suhbatida ishtirok etdi va qator ikki tomonlama uchrashuvlar o‘tkazdi. Muzokaralar yakunlari bo‘yicha umumiy qiymati 100 milliard dollardan ortiq bo‘lgan shartnomalar va investitsiya loyihalari portfeli shakllantirildi, deb xabar beradi Markaziy Osiyo respublikasi rahbari matbuot xizmati.
Davra suhbatida AQSH va O‘zbekiston o‘rtasidagi hamkorlikning ko‘plab iqtisodiy sohalardagi jihatlari muhokama qilindi. Tadbirda yirik kompaniyalar, sarmoya fondlari va moliya institutlari rahbarlaridan tashqari, AQSH prezidentning Janubiy va Markaziy Osiyo bo‘yicha maxsus elchisi Serjio Gor, Global hamkorlik bo‘yicha maxsus elchisi Paolo Zampolli, AQSH Savdo vaziri o‘rinbosari Uilyam Kimmitt, Amerika-O‘zbekiston Savdo palatasi raisi Kerolin Lemm ishtirok etdi.
Mirziyoyev prezident Donald Tramp bilan yaqinda bo‘lib o‘tgan suhbat chog‘ida iqtisodiy hamkorlikni kengaytirish va uzoq muddatli loyihalarning mustahkam portfelini yaratish bo‘yicha kelishuvga erishilganini ta’kidladi.
Mamlakatlar o‘rtasidagi tovar ayirboshlash hajmi so‘nggi sakkiz yilda to‘rt barobar oshgani ta’kidlandi. Amerikaning 300 dan ortiq kompaniyasi O‘zbekistonga sarmoya kiritgan. Masalan, Franklin Templeton bilan birgalikda Milliy investitsiya fondi tashkil etilgan.
Belgilangan ustuvor yo‘nalishlar qatoriga muhim foydali qazilmalar va barqaror yetkazib berish zanjirlarini rivojlantirish bo‘yicha hamkorlik, shuningdek, IT, sun’iy intellekt, raqamlashtirish, transport, energetika va ijtimoiy infratuzilmani rivojlantirish, «aqlli» qishloq xo‘jaligi, ilg‘or texnologiyalarni joriy etish va boshqa sohalardagi hamkorlik kiradi.
O‘zbekiston Prezidenti matbuot xizmati xabariga ko‘ra, uchrashuv yakunlari bo‘yicha quyidagi hujjatlar imzolandi:
✅ Transport vazirligi va Boeing kompaniyasi o‘rtasida transport sohasida uzoq muddatli hamkorlik to‘g‘risida bitim;
✅ «Texnopark» MCHJ va FLSmidth kompaniyasi o‘rtasida tog‘-kon uskunalarini ishlab chiqarish bo‘yicha qo‘shma korxona tashkil etish to‘g‘risida bitim;
✅ «Akfa group» va Cleveland Clinic o‘rtasida ko‘p tarmoqli klinika va ta’lim muassasasini tashkil etish to‘g‘risida bitim;
✅ Centrum Air aviakompaniyasi va Oppenheimer investitsiya kompaniyasi o‘rtasida o‘zaro sheriklik va hamkorlik to‘g‘risida bitim;
✅ Iqtisodiyot va moliya vazirligi va Citigroup kompaniyasi o‘rtasida hamkorlik to‘g‘risida bitim;
✅ «O‘zbekgidroenergo» AJ va Cargill Financial Services International kompaniyasi o‘rtasida moliyaviy hamkorlik to‘g‘risida bitim;
✅ «O‘ztransgaz» AJ va Pangea Filtration Technology kompaniyasi o‘rtasida hamkorlik to‘g‘risida bitim;
✅ Tog‘-kon sanoati va geologiya vazirligi hamda Cove Capital kompaniyasi o‘rtasida istiqbolli maydonlarda geologiya-qidiruv ishlarini olib borish to‘g‘risida bitim;
✅ «Yangi Kon» MCHJ va SLB kompaniyasi o‘rtasida hamkorlik to‘g‘risida bitim;
✅ SO‘zbekiston Tiklanish va taraqqiyot jamg‘armasi bilan Biologic International kompaniyasi o‘rtasida sun’iy intellekt va biotexnologiyalar sohasidagi loyihalarni moliyalashtirish uchun jamg‘armalar tashkil etish bo‘yicha hamkorlik to‘g‘risida bitim.
