frank.uz sayti fotosurati
O‘zbekiston Energetika vaziri Jo‘rabek Mirzamahmudov yangi istiqbolli loyihalarni hisobga olgan holda amerikalik investorlar Markaziy Osiyo respublikasi energetika sohasiga taxminan 3-4 milliard dollar sarmoya kiritishga tayyor ekanini ma’lum qildi. Spot.uz nashri «O‘zbekiston 24» telekanaliga tayangan holda mulozim so‘zlarini keltiradi.
Vazirning tushuntirishicha, bu ko‘mirni gazlashtirish, gaz sintezini ishlab chiqarish, ammiak, metanol va boshqa qo‘shimcha qiymatli mahsulotlar ishlab chiqarish bo‘yicha yangi kelishuvlarga taalluqlidir.
U yana bir qancha tashabbuslarni ham muhokama qilgan. Xususan, burg‘ulash sohasida Energetika vazirligi zamonaviy texnologiyalar, tajriba va boshqaruv usullarini qo‘llash bo‘yicha Schlumberger va Baker Hughes kompaniyalari bilan shartnomalar imzolagan.
«O‘zbekneftgaz» davlat korxonasi va Amerikaning Gulf kompaniyasi o‘rtasida butun mamlakat bo‘ylab yoqilg‘i quyish shoxobchalari tarmog‘ini yaratish bo‘yicha memorandum imzolangan. Ushbu loyiha 100 million dollarga baholanmoqda.
Tegishli vazirlik gaz uzatish tizimi va kompressor stansiyalarida gaz agregatlarini elektr dvigatellariga almashtirish bo‘yicha olib borilayotgan muzokaralarda sezilarli yutuqlarga erishgan. Bundan tashqari, vazirlik rahbari ta’kidlashicha, AQSH Eksport-import banki bu boradagi ishlarni moliyalashtirishga qiziqish bildirgan.
Mirzamaxmudovning ta’kidlashicha, 2-3 yillik dastur doirasida kompressor stansiyalaridagi agregatlarni almashtirish kamida 800 million dollarga tushadi. AQSH Eksimbanki O‘zbekistonga 852 million dollarlik kredit liniyasi ochishga tayyor ekanini ma’lum qilgan.
Vazir shuningdek, Air Products kompaniyasi mamlakat bilan hamkorlikni kengaytirish niyatida ekanligini qo‘shimcha qildi. Bunga qo‘shimcha investitsiyalar va biznes yo‘nalishlarini diversifikatsiya qilish kiradi.
Darvoqe, O‘zbekiston prezidenti Shavkat Mirziyoyev yaqinda AQSHga tashrifi chog‘ida Air Products kompaniyasi rahbari Eduardo Menezes bilan uchrashgan edi.
Qayd etilishicha, kompaniyaning Markaziy Osiyo davlatiga kiritgan sarmoyasi 1 milliard dollardan oshgan. GTL zavodida sanoat gazlarini qayta ishlash, Farg‘ona neftni qayta ishlash zavodida vodorod va «Navoiyazot»da suyuq karbonat angidrid gazini ishlab chiqarish, shokli muzlatish markazini tashkil etish ishlari amalga oshirilgan loyihalar qatoriga kiradi.
Shu bilan birga, tomonlar Buxoroda gaz-kimyo majmuasini qurish, ko‘mirni gazlashtirish, toza aviatsiya yoqilg‘isi ishlab chiqarishni yo‘lga qo‘yish bo‘yicha hamkorlikni jadallashtirishga kelishib oldilar. Tegishli loyihalar bo‘yicha «yo‘l xaritasi» tasdiqlangan.
