kun.uz sayti fotosurati
O‘zbekiston Soliq qo‘mitasi tadbirkorlarni norasmiy iqtisodiy faoliyat bilan shug‘ullanuvchi kompaniyalar bilan hamkorlik qilish soliq to‘lashdan bo‘yin tovlash sifatida qaralishidan ogohlantirdi. Bu haqda ko‘mitaning Telegram-kanalida so‘z yuritilgan.
Soliq qo‘mitasi ishbilarmonlarga qo‘mita sayti orqali «shubhali» kompaniyalar ro‘yxatini o‘z ichiga olgan hamkorlar va pudratchilarning ishonchliligini mustaqil tekshirishni tavsiya qiladi. Hozirda ro‘yxat 7522 ta subyektni o‘z ichiga oladi va reyestr muntazam yangilanib turadi.
Soliqchilarning xabariga ko‘ra, joriy yilning o‘zida faoliyatida shubhali holatlar kuzatilgan va naqdlashtirish faoliyati bilan shug‘ullangan 902 ta subyekt aniqlangan.
Shu sababli, Soliq qo‘mitasi aloqalarni o‘rnatishda yangi hamkorlardan moliyaviy hisobotlarni so‘rashni tavsiya qiladi. Tegishli hujjatlarning yo‘qligi yoki yolg‘on ma’lumotlarning taqdim etilishi shubha uyg‘otishi kerak, chunki vijdonli tadbirkorlar o‘z faoliyati haqidagi ma’lumotlarni yashirmaydilar.
Shuningdek, quyidagilar tavsiya etiladi:
✅ Korxonaning Soliq qo‘mitasi veb-sayti reyestrida mavjudligini tekshirish;
✅ Korxonaning ko‘rsatilgan manzilda rostdan mavjudligini, shu jumladan, uning ofisi va omborxonalari borligini tekshirish;
✅ Bo‘lajak hamkorning ijtimoiy tarmoqlardagi mavjudligi, kompaniya sharhlari, reytinglari va Internetda ochiq bo‘lgan boshqa ma’lumotlarni ko‘rib chiqish orqali tahlil qilish.
Agar kontragentda norasmiy iqtisodiy faoliyat yuritganlik holatlari aniqlangan taqdirda, soliq organlari ayrim operatsiyalarni e’tiborga olmaslikka hamda to‘lanishi lozim bo‘lgan soliqlar summalarini o‘zgartirishga haqli ekanidan ogohlantiradi.
Bunday subyektlar bilan hamkorlik qilish soliq to‘lashdan bo‘yin tovlash sifatida qaralishi mumkin.
ℹ️ Respublika Soliq qo‘mitasi ma’lumotlariga ko‘ra, joriy yilning yanvar-iyun oylarida o‘z daromadlarini yashirgan jismoniy shaxslar va uy xo‘jaliklari faoliyatini hisobga olgan holda kuzatilmaydigan O‘zbekiston iqtisodiyoti 265,5 trillion so‘mga (21,2 milliard dollar) yetgan, bu esa mamlakat yalpi ichki mahsulotining 32,9 foizini tashkil etadi.
