Sputnik fotosurati
Tashkillashtirilgan tartibda, ya'ni rasman ishga yollanish kanallari orqali Rossiyaga kelayotgan tojikistonlik mehnat migrantlari o'z mamlakatida ma'lum protseduralardan o'tish imkoniga ega bo'ladi. Rossiya prezidenti Vladimir Putin Tojikiston bilan tuzilgan shartnomaga o'zgartirish kiritishni o'z ichiga olgan protokolni ratifikatsiya qilishga oid qonunni imzoladi, deb xabar beradi «Interfaks».
Hujjatga ko'ra, Rossiyada rasman ishga yollanish kanallari orqali ishlashni istagan tojikistonlik fuqarolar o'z yurtida oldindan suratga tushishi va barmoq izlarini topshirishlari mumkin. Bu Rossiya Ichki ishlar vazirligining Tojikistondagi idorasi tomonidan vakolatli Rossiya agentliklari ishtirokida amalga oshiriladi.
Shundan so'ng ma'lumotlar Rossiya migratsiya bazalarida tekshiriladi. Bu shaxsning Rossiya Federatsiyasiga kirishi taqiqlanganligini oldindan tekshirish imkonini beradi.
Bundan tashqari, protokol migrant ishchilarni Rossiyaga kelishidan oldin Tojikistonda tibbiy ko'rikdan o'tkazish uchun zamin yaratadi.
Hujjat shuningdek, tojikistonlik fuqarolarni Rossiya o'rta maxsus kasb-hunar ta'limi dasturlari bo'yicha o'qitishni ham ko'zda tutadi. Boshqacha qilib aytganda, ba'zi ishchilar safardan oldin Rossiya mehnat bozoriga tayyorgarlik ko'rishlari mumkin bo'ladi.
Shartnomaga yangi ishtirokchi qo'shiladi — Tojikistonda tashkilish ishga yollashni muvofiqlashtiradigan va zarur tadbirlarni o'tkazishda yordam beradigan vakolatli Rossiya tashkiloti.
Rossiya rasmiylari bu o'zgarishlarni mehnat migratsiyasini soddalashtirish va migratsiya qonunlariga rioya qilinishini kuchaytirish zarurati bilan izohlaydilar.
Tojikiston fuqarolarini vaqtinchalik ish uchun uyushgan holda yollash to'g'risidagi shartnoma 2019 yil bahoridan beri amal qiladi. 2025 yil oktyabrь oyida Rossiya va Tojikiston prezidentlari Vladimir Putin va Emomali Rahmon tomonidan hujjatga o'zgartirishlar kiritish protokoli imzolangandi.
O'shanda Putin Rossiya ishchi kuchiga qiziqish bildirayotganini, ammo bu «bizga kerak bo'lgan ishchi kuchi» bo'lishi kerakligini aytgandi. «Ikkinchidan, odamlarning o'zlari yaxshi sharoitda yashashi va qonunlarimizga rioya qilishlari kerak», — degandi u va hozirda bu sohada ko'plab muammolar mavjudligini qo'shimcha qilarkan.
Tojikiston Mehnat vazirligining ma'lumotlariga ko'ra, 2025 yili tashkiliy tartibga ishga yollash doirasida mamlakatdan Rossiyaga 31 000 dan ortiq odam yuborilgan.
O'zbekiston Rossiya bilan fuqarolarni tashkillashtirilgan holda ishga yollash shartnomasini imzolagan birinchi davlat bo'lgan. Tegishli hujjat 2017 yili imzolangan edi.
