Videodan skrinshot
Qozog‘istonning Uralsk shahrida politsiya mashhur faol va jurnalist Lukpan Axmedyarovni hibsga oldi. Uning mashinasi, unda rafiqasi bilan birga bo‘lgan holda, hujjatlarni tekshirish uchun to‘xtatilgan. Tekshiruv chog‘ida Lukpan Axmedyarov xalqaro qidiruvda ekani aniqlangan.
Bu haqda Facebookda jurnalist bilan bog‘liq holatni «Prosto jurnalistika» YouTube kanali prodyuseri Raul Uporov xabar berdi.
Uning so‘zlariga ko‘ra, jurnalist Rossiya so‘rovi bo‘yicha qidirilmoqda. Unga nisbatan jinoiy ish 2025 yil 25 dekabrda Moskva viloyati IIV boshqarmasi tomonidan qo‘zg‘atilgan. «Qaysi modda bo‘yicha ekanini Lukpan o‘zi ham bilmaydi», — deb yozadi Uporov.
Ayni paytda Nege Telegram-kanali keltirgan rasmiy versiyaga ko‘ra, 22 iyun kuni patrul xizmatchilari Volkswagen avtomobilni to‘xtatgan, uning rulida Lukpan Axmedyarov bo‘lgan. Tekshiruv davomida u boshqa shaxsga tegishli avtomobilni majburiy sug‘urta polisisiz boshqarayotgani aniqlangan va shu sababli unga nisbatan ma’muriy javobgarlik chorasi qo‘llanilgan. Shuningdek, politsiya bayonotida «haydovchining tashqi belgilari shubha uyg‘otgani» aytilgan va u tibbiy ko‘rikdan o‘tkazish uchun yuborilgan.
Jurnalistning Rossiya IIV so‘rovi bo‘yicha xalqaro qidiruvda ekani haqidagi ma’lumotlar huquqni muhofaza qiluvchi idoralar tomonidan izohlanmagan.
Vlast.kz nashri ma’lumotiga ko‘ra, Lukpan Axmedyarov hanuzgacha politsiyada saqlanmoqda.
Lukpan Axmedyarov — mashhur jurnalist, fuqarolik faoli va huquq himoyachisi. U avval «Uralskaya nedelya» nashrining bosh muharriri bo‘lgan va ko‘plab rezonans tekshiruv materiallari muallifi hisoblanadi. So‘nggi yillari u «Prosto jurnalistika» YouTube-loyihasi doirasida Ukrainadagi urush haqida bir nechta maxsus reportajlar tayyorlagan.
