Shavkat Mirziyoyev va Irakliy Kobaxidze. O‘zbekiston prezidenti matbuot xizmati fotosurati
Gruziya hududida sanoat zonasi va o‘zbek mahsulotlari shourumi tashkil etilgan logistika xabi yaratiladi. Ushbu tashabbus Tbilisida bo‘lib o‘tgan muzokaralarda O‘zbekiston prezidenti Shavkat Mirziyoyev va Gruziya bosh vaziri Irakliy Kobaxidze tomonidan qo‘llab-quvvatlandi, deb xabar beradi O‘zbekiston rahbari matbuot xizmati.
Transport-logistika sohasidagi hamkorlik uchrashuvning asosiy mavzularidan biri bo‘ldi. Tomonlar O‘zbekiston tomonidan Poti va Batumi dengiz portlari infratuzilmasidan faol foydalanish masalasini muhokama qildi. Mirziyoyev Boku — Tbilisi — Kars temir yo‘l koridorining ishga tushirilishini qo‘llab-quvvatlab, uni barpo etilayotgan Xitoy — Qirg‘iziston — O‘zbekiston magistrali bilan bog‘lash imkoniyatlarini ko‘rib chiqishni taklif qildi.
Muzokaralar davomida savdo-iqtisodiy aloqalar masalasi ham ko‘tarildi, bu sohada davlatlar o‘rtasida hamkorlikni kengaytirish uchun katta salohiyat mavjudligi ta’kidlandi. O‘tgan yili ikki davlat o‘rtasidagi tovar aylanmasi 270 million dollarga yetdi, joriy yil boshidan bu ko‘rsatkich 100 million dollardan oshdi. Ikki mamlakat rahbarlari yaqin yillarda tovar aylanmasini 1 milliard dollarga yetkazish, import-eksport operatsiyalaridagi nomutanosiblikni bartaraf etish hamda talab yuqori bo‘lgan mahsulotlar o‘zaro yetkazib berishni kengaytirish bo‘yicha harakatlar rejasini kelishib oldi. Shuningdek, sanoat ko‘rgazmalarini o‘zaro tashkil etish masalasi ham muhokama qilindi.
Mirziyoyev va Kobaxidze kecha bo‘lib o‘tgan qo‘shma biznes-forum natijalarini yuqori baholadi. Ushbu forum doirasida 2027 yilgacha sanoat kooperatsiyasi dasturi imzolandi.
Bundan tashqari, qishloq xo‘jaligi, elektrotexnika sanoati, energetika, farmatsevtika, oziq-ovqat va yengil sanoat, qurilish materiallari ishlab chiqarish, turizm, IT sohasi hamda raqamli bank tizimi yo‘nalishlarida yangi loyihalarni amalga oshirish bo‘yicha kelishuvlarga erishildi. Ushbu tashabbuslarni qo‘llab-quvvatlash maqsadida O‘zbekiston va Gruziya qo‘shma investitsiya jamg‘armasini tashkil etadi.
Uchrashuvda madaniy-gumanitar aloqalarni mustahkamlash masalasi ham muhokama qilindi. Jumladan, joriy yil mart oyida Toshkentda Gruzin madaniyati kunlari muvaffaqiyatli o‘tkazildi. Shu fursatdan foydalanib, Mirziyoyev Tbilisidagi bog‘lardan biriga o‘zbek shoiri Alisher Navoiy nomini berilgani uchun gruzin tomoniga minnatdorlik bildirdi.
Muhim voqealardan biri O‘zbekistonning Gruziyada elchixona ochish to‘g‘risidagi qaror qabul qilingani bo‘ldi.
Mirziyoyev Tbilisiga amalga oshirilgan ushbu tashrif so‘nggi yigirma yildan ortiq vaqt ichidagi ilk tashrif ekanini ta’kidlab, bu ikki davlat o‘rtasidagi munosabatlarni sifat jihatidan yangi bosqichga olib chiqishda alohida ahamiyatga ega ekanini bildirdi.
Muzokaralar yakunlari bo‘yicha erishilgan kelishuvlarni amalga oshirish uchun «yo‘l xaritasi» shakllantirildi.
Shuningdek, tomonlar strategik sheriklik o‘rnatish to‘g‘risida Deklaratsiya imzoladi. O‘zbekiston prezidenti va Gruziya bosh vaziri ishtirokida ikki davlatning bir qator idoralari vakillari bojxona tartib-taomillari, axborot-kommunikatsiya texnologiyalari, ta’lim, ekologiya, sog‘liqni saqlash, mehnat migratsiyasi va boshqa sohalarda hamkorlikni nazarda tutuvchi hujjatlar almashdi.
Mirziyoyevning Tbilisiga tashrifi 2 iyul kuni boshlangan. Shu kuni O‘zbekiston rahbari Gruziya prezidenti Mixail Kavelashvili bilan uchrashdi. U uchrashuv davomida mehmonga o‘z mamlakatining eng yuqori davlat mukofoti — «Oltin mo‘yna» ordenini topshirdi.
