«Farg‘ona" fotosurati
Qirg‘iziston, jumladan, AQSH, Buyuk Britaniya va Yevropa Ittifoqi tomonidan joriy etilgan sanksiyalarni buzmoqda, degan ma’lumotlar asossizdir. Shu bilan birga, respublika hamkorlariga buni tasdiqlovchi barcha zarur dalillarni taqdim etishga tayyor. Bu haqda Markaziy Osiyo davlati Tashqi ishlar vaziri Jeenbek Kulubayev jurnalistlar bilan uchrashuvda ma’lum qildi, deb xabar beradi «Vecherniy Bishkek».
Uning qo‘shimcha qilishicha, ikki xil maqsadda foydalanilishi mumkin bo‘lgan barcha tovarlar idoralararo ishchi guruh tomonidan sinchkovlik bilan tekshiriladi. Agar yuk amaldagi talablarga muvofiq bo‘lsa, u respublika hududiga kiritiladi, aks holda tovar musodara qilinadi yoki jo‘natuvchiga qaytariladi.
Kulubayevning ta’kidlashicha, elchixonalar xodimlari hamkorlarga sanksiya siyosati bilan bog‘liq masalalarni aniq tushuntirishlari lozim. Xususan, tashqi savdo tuzilmasidagi o‘zgarishlarga oid jihatlarni izohlab berish muhim.
«Masalan, Yevropa tomoni nega u yoki bu mamlakat bilan tovar ayirboshlash hajmi keskin oshganiga qiziqishi mumkin. Bizning diplomatlarimiz bu o‘sish Qirg‘izistondagi ichki loyihalarni amalga oshirish uchun uskunalar xarid qilinishi bilan bog‘liq ekanini, sanksiya ostidagi mahsulotlarni qayta eksport qilish bilan emasligini aniq tushuntirishlari kerak», — dedi vazir.
U misol sifatida Xitoy — Qirg‘iziston — O‘zbekiston temir yo‘lini qurish uchun uskunalar xaridi, shuningdek, Qambarota GES-1 qurilish maydonidagi tayyorgarlik ishlari uchun olib kirilgan jihozlarni keltirdi. Tashqi ishlar vaziri so‘zlariga ko‘ra, respublikaga import qilingan barcha mahsulotlar faqat mamlakat ichida foydalanilmoqda.
Kulubayevning ta’kidlashicha, Qirg‘iziston xalqaro sanksiya rejimlariga qat’iy rioya qiladi.
Vazir diplomatik korpus import-eksport bitimlari bo‘yicha tushuntirish ishlarini yanada kuchaytirishi zarurligiga ham e’tibor qaratdi.
Shuningdek, vazir yangi yildan keyin amalga joriy etiladigan yangilik haqida ham ma’lum qildi. Gap sayyor elchilar institutini joriy etish haqida bormoqda. Bunday Tashqi ishlar vazirligi xodimlari doimiy ravishda Qirg‘izistonda faoliyat yuritadi, bir vaqtning o‘zida mamlakatni muayyan xorijiy davlatda ham vakillik qiladi. Ya’ni amaldor xorijda doimiy yashash o‘rniga, hamkasblari bilan uchrashuvlar o‘tkazish, investitsiya loyihalarini ilgari surish va hamkorlikni muvofiqlashtirish uchun vaqti-vaqti bilan xizmat safarlariga chiqadi.
«To‘laqonli elchixona faoliyatini yuritish — bino, ofis, diplomatlar uchun turar joy, ish haqi, tibbiy sug‘urta, transport va boshqa xarajatlarni talab qiladi. Masalan, Qirg‘iziston Germaniyada to‘laqonli diplomatik vakolatxonaga ega. Shu bilan birga, hamkorlik hajmi hozircha katta bo‘lmagan, ammo istiqbolli tashabbuslar mavjud bo‘lgan davlatlar uchun sayyor elchi formatida ishlash taklif etilmoqda. Xususan, bunday mexanizm Islandiyaga nisbatan qo‘llanilishi mumkin», — dedi Kulubayev.
Tashqi ishlar vaziri fikriga ko‘ra, bunday yondashuv nafaqat budjet xarajatlarini maqbullashtirish, balki xalqaro loyihalarni amalga oshirishda diplomatlarning Qirg‘izistondagi boshqa davlat idoralari vakillari bilan hamkorligini yanada samarali qilish imkonini beradi.
