2025 yil yakunlariga ko‘ra, Xitoy Qirg‘izistondagi eng yirik investorga aylandi va birinchi o‘rindan Rossiyani surib chiqardi. Bu haqda Economist.kg Yevroosiyo iqtisodiy komissiyasi ma’lumotlariga tayanib xabar berdi.
Qirg‘izistonga kiritilgan to‘g‘ridan to‘g‘ri xorijiy investitsiyalarning umumiy hajmi 335,4 million AQSH dollariga yetdi, bu 2024 yilgi ko‘rsatkichdan 31,4 foizga ko‘pdir. Xitoy 305,7 million dollar miqdorida investitsiya kiritgan. Keyingi o‘rinlarni Niderlandiya (69,5 million dollar), Rossiya (56,3 million dollar), Turkiya (48,6 million dollar), Kipr (26 million dollar), Qozog‘iston (25,6 million dollar) va Buyuk Britaniya (24,3 million dollar) egallagan.
Shu bilan birga, 2024 yilda investitsiyalar hajmi 255,3 million dollarni tashkil etgan bo‘lib, bu avvalgi yilgi 159,2 million dollarlik ko‘rsatkichdan 60,4 foizga ko‘p bo‘ldi. Rossiya birinchi o‘rinni saqlab qolgan va investitsiya hajmini 161,9 million dollarga yetkazgandi. Qozog‘iston o‘z investitsiyalarini 100,8 million dollargacha oshirgan, uchinchi yirik investor esa 75,7 million dollar bilan Luksemburg bo‘lgan.
Ikki yil ichida to‘g‘ridan to‘g‘ri xorijiy investitsiyalarning sof hajmi 176,2 million dollarga oshdi, bu 110,7 foizlik o‘sishga teng.
Qayd etish lozim, Xitoy ikki yil davomida sof kapital chiqimi, ya’ni iqtisodiy sharoitlar o‘zgarishi yoki loyihalar yakunlanishi sabab investorlar tomonidan mablag‘larni olib chiqish holatidan so‘ng yetakchi investorga aylandi. 2023 yilda Xitoy bo‘yicha ko‘rsatkich —72,7 million dollarni, 2024 yilda esa —77,8 million dollarni tashkil etgan. 2025 yilda esa bu ko‘rsatkich keskin o‘zgarib, 305,7 million dollar miqdoridagi eng yirik investitsiya oqimiga aylangan.
