magput.ru sayti fotosurati
Tojikistonda Turizmni rivojlantirish jamg‘armasi tashkil etildi. U, jumladan, mahalliy va xorijiy sayyohlardan undiriladigan yig‘imlar hisobiga to‘ldirib boriladi. Tegishli qaror mamlakat hukumati tomonidan 1 iyul kuni qabul qilingan, deb xabar beradi «Aziya-Plyus».
Jamg‘arma bir nechta manbalar hisobidan shakllantiriladi:
▪️ Tojikiston fuqarolariga xorijga safarlar uchun turistik paketlar sotishdan tushgan mablag‘ning 5 foizi miqdoridagi ajratmalar;
▪️ xorijiy sayyohlarning mamlakat ichidagi safarlari davomida har bir sutka uchun turistik paketlardan undiriladigan yig‘im;
▪️ turistik xizmatlar ko‘rsatish uchun ruxsat beruvchi hujjatni rasmiylashtirish uchun to‘lov;
▪️ mazkur yig‘imlarni to‘lashdan bo‘yin tovlaganlik uchun jarimalar;
▪️ depozitlardan olinadigan daromadlar;
▪️ xalqaro moliyaviy tashkilotlarning grantlari va maqsadli mablag‘lari.
Birinchi ikki band 2019 yilda joriy etilgan «turistik soliq» deb ataladigan yig‘imni anglatadi. O‘sha paytda xorijiy sayyohlar va turistik kompaniyalar orqali xorijga chiquvchi respublika fuqarolari har bir sutka uchun 1 dollardan to‘lashi kerakligi xabar qilingan edi. Bunday yig‘imni to‘lashdan Ikkinchi jahon urushi faxriylari, Chernobil AESidagi avariya oqibatlarini bartaraf etishda qatnashganlar, birinchi va ikkinchi guruh nogironligi bo‘lgan shaxslar, 16 yoshgacha bo‘lgan bolalar, shuningdek, diplomatlar ozod qilingan.
Turizmni rivojlantirish jamg‘armasiga kelib tushgan barcha mablag‘lar aniq va maqsadli yo‘naltiriladi. Ular faqat turistik infratuzilmani yaratish va rivojlantirish, kadrlar tayyorlash va ularni ijtimoiy qo‘llab-quvvatlash, xizmat ko‘rsatish sifatini oshirish, mamlakatning turistik imkoniyatlarini taqdim etish va targ‘ib qilish, shuningdek, innovatsiyalarni joriy etish hamda tadqiqotlar o‘tkazishga sarflanadi. Yil davomida ishlatilmagan mablag‘lar keyingi yilga o‘tkaziladi.
Jamg‘arma mablag‘larini boshqarish 13 kishidan iborat Kengash zimmasiga yuklatilgan bo‘lib, unga Turizmni rivojlantirish qo‘mitasi raisi va uning birinchi o‘rinbosari rahbarlik qiladi. Kengash tarkibiga, shuningdek, vazir o‘rinbosarlari, tegishli idoralar rahbarlari va turizm sohasidagi jamoat birlashmasi vakili kiritilgan. Kengash tushumlar va xarajatlarni tasdiqlaydi, mablag‘larning maqsadli sarflanishini hamda auditorlik hisobotlarini ko‘rib chiqadi va nazorat qiladi.
Kengash kotibiyati vazifasini Turizmni rivojlantirish qo‘mitasi bajaradi. Qo‘mita har yarim yilda hukumatga hisobot beradi, shaffoflikni ta’minlash maqsadida esa har yili o‘z rasmiy saytida Jamg‘arma faoliyati natijalari haqida to‘liq ma’lumot e’lon qiladi.
2026 yil iyul oyi oxirida Tojikiston hukumati Turizmni rivojlantirish strategiyasini 2027–2030 yillarda amalga oshirish rejasini tasdiqladi va kelgusi uch yilda sohani rivojlantirish uchun 270 mln somonidan (29 mln dollar) ortiq mablag‘ ajratdi. Yangi strategiya 37 ta asosiy tadbirni o‘z ichiga oladi va tog‘li hududlarda jihozlangan palatkali lagerlar tashkil etishdan tortib, «Raqamli mehmon» (E-mehmon) tizimini joriy etish va mamlakatni xalqaro ko‘rgazmalarda taqdim etishgacha bo‘lgan sohaning barcha yo‘nalishlarini qamrab oladi.
