Shavkat Mirziyoyev va Li Chje Myon. O‘zbekiston prezidenti matbuot xizmati fotosurati
O‘zbekiston va Janubiy Koreya qiymati qariyb 12 milliard dollarni tashkil etuvchi qo‘shma loyihalarni o‘z ichiga olgan yangi investitsiya portfelini shakllantirdi. Mamlakatlar o‘rtasidagi hamkorlikning ushbu va boshqa yo‘nalishlari Seulda ikki davlat prezidentlari — Shavkat Mirziyoyev va Li Chje Myon uchrashuvida muhokama qilindi. Bu haqda Markaziy Osiyo respublikasi prezidenti matbuot xizmati xabar berdi.
Muzokaralar chog‘ida O‘zbekiston va Koreya Eksimbanki 8 milliard dollarlik strategik sheriklik dasturini qabul qilgani ta’kidlandi. Ushbu tuzilma Koreya xalqaro hamkorlik agentligi (KOICA) va EDCF jamg‘armasi bilan hamkorlikda Markaziy Osiyo mamlakatida tibbiyot va sog‘liqni saqlash, sanoat, IT, qishloq va suv xo‘jaligi, energetika, infratuzilma hamda ta’lim sohalarida qator loyihalarni amalga oshirmoqda.
Prezidentlar ilg‘or Koreya texnologiyalari va O‘zbekistonning resurs hamda sanoat salohiyatiga asoslangan mustahkam innovatsion va texnologik alyansni shakllantirishga alohida e’tibor qaratdilar. Kiberxavfsizlik, sog‘liqni saqlash tizimi va farmatsevtika ishlab chiqarishini keng ko‘lamda raqamlashtirishga e’tibor qaratish taklif etildi.
Tomonlar alohida strategik sheriklikni yanada rivojlantirish masalalarini muhokama qilib, tovar ayirboshlash va investitsiyalar hajmining o‘sayotganini qayd etdilar. O‘zbekistonda Koreya kapitali ishtirokida 700 dan ortiq qo‘shma korxona faoliyat yuritmoqda. Mamlakat bozorida Samsung, LG, Lotte va boshqa taniqli kompaniyalar ham ish olib bormoqda.
Investitsiyaviy hamkorlikning asosiy loyihalari qatorida Jizzax viloyatidagi KIA avtomobillarini ishlab chiqarish zavodi, Milliy bolalar tibbiyot markazi, Surgil koni negizidagi Ustyurt gaz-kimyo majmuasi va boshqa yirik loyihalar bor.
Shu bilan birga, davlat rahbarlari parlamentlar, hukumatlar, alohida vazirliklar, hududiy ma’muriyatlar va ishbilarmon doiralar darajasidagi aloqalarni faollashtirish zarur, degan xulosaga keldilar.
Mirziyoyev iqtisodiy hamkorlikni kengaytirishning beshta ustuvor yo‘nalishini belgilab berdi:
✅ savdo;
✅ investitsiyalar;
✅ muhim strategik minerallarni qazib olish va qayta ishlash;
✅ transport;
✅ infratuzilma.
Prezidentlar, shuningdek, turli qo‘shma tadbirlar o‘tkazish va harbiy mutaxassislarni tayyorlashni ham o‘z ichiga olgan harbiy-texnik hamkorlikni rivojlantirishga tayyor ekanliklarini ta’kidladilar.
Muzokaralar davomida gumanitar va madaniy aloqalar masalalari ham muhokama qilindi. O‘zbekistonda Janubiy Koreya universitetlarining to‘rtta filiali faoliyat yuritib, zamonaviy mehnat bozorida talab yuqori bo‘lgan yo‘nalishlar uchun kadrlar tayyorlamoqda. Bundan tashqari, yoshlarni kasbga o‘qitish bo‘yicha beshta markaz ishlab turibdi.
Mirziyoyev ta’kidlashicha, ko‘p sonli koreys diasporasi O‘zbekistonning ko‘p millatli oilasining ajralmas qismi bo‘lib, mamlakatlar va xalqlar o‘rtasida «ma’naviy ko‘prik» vazifasini bajaradi. Shu munosabat bilan 2027 yilni «Madaniyat va o‘zaro almashinuvlar yili» deb e’lon qilish hamda ko‘plab qo‘shma tadbirlar o‘tkazishga qaror qilindi.
Oliy darajadagi muzokaralar yakunlari bo‘yicha Mirziyoyev va Li Chje Myon ishtirokida ikki tomonlama qator hujjatlarni imzolash marosimi bo‘lib o‘tdi. Shartnoma va kelishuvlar iqtisodiyot, savdo, investitsiyalar, aviatsiya, turizm, qishloq xo‘jaligi, maktab va maktabgacha ta’lim, yuqori texnologiyalar va sun’iy intellektdan foydalanish, iqlim o‘zgarishiga qarshi kurashish va boshqa sohalardagi hamkorlikni qamrab oladi.
