t.me/customs_rf fotosurati
Qozog‘iston Yevroosiyo Iqtisodiy Komissiyasiga (YEIK) Rossiya chegarasidagi tirbandlik va Rossiyaning yangi immigratsiya qonunchiligi bo‘yicha haydovchilarning shikoyatlari yuzasidan murojaat qildi. Bu haqda 9 oktyabr kuni Qozog‘iston hukumati matbuot xizmati xabar berdi.
Ostona mavjud vaziyatni «tashqi savdoga to‘sqinlik qiluvchi to‘siq» sifatida tan olinishiga umid qilmoqda. Bu masala 13 oktyabr kuni YEIKda va 7 noyabr kuni Qozog‘iston va Rossiya o‘rtasidagi hamkorlik bo‘yicha hukumatlararo komissiyaning 26-yig‘ilishida ko‘rib chiqiladi, deyiladi press-relizda, uning asosiy qismi Rossiya Federatsiyasiga kirishning yangi qoidalari va og‘ir yuk mashinalari haydovchilarining shikoyatlariga bag‘ishlangan.
Gap chet el fuqarolariga Rossiya Federatsiyasida ro‘yxatdan o‘tmasdan, kirish va chiqishlar sonidan qat’i nazar, kalendar yilida 90 kundan ortiq bo‘lmagan muddatga qolishga ruxsat beruvchi qonun haqida bormoqda. Ilgari bu muddat yiliga 180 kun bo‘lgan. Ushbu cheklovlar xalqaro yuk va yo‘lovchi tashish bilan shug‘ullanuvchi haydovchilarga ham tegishli. Bundan tashqari, Rossiya va Belorussiyada turib qolishlar birga hisoblanadi, chunki bu davlatlar Ittifoq davlatini tashkil qiladi.
Ushbu qoida vizasiz bo‘lgan ko‘pgina mamlakatlarga, jumladan Qozog‘iston, Armaniston, Ozarbayjon, Qirg‘iziston, O‘zbekiston va boshqalarga nisbatan qo‘llaniladi. Qozog‘istonda shunga o‘xshash xorijiy fuqarolarning ro‘yxatdan o‘tmasdan qolishlari uchun olti oylik muddat ichida 90 kun bo‘lish talablari xalqaro yuk va avtobus qatnovi bilan shug‘ullanuvchi haydovchilarga nisbatan qo‘llanilmaydi, bu xalqaro amaliyotga mos keladi, deya ta’kidlaydi hukumat.
Majilis (parlament quyi palatasi) deputati Bolatbek Najmetdinulining qayd etishicha, yangi qoidalar nafaqat xalqaro tashuvchilarga, balki YEOII mamlakatlarida ishlovchi haydovchilarga ham tegishli. Ularning aksariyatida Rossiya Federatsiyasida qolish limiti tugagan va ular reyslarni davom ettirish uchun yangi yil boshini kutishga majbur. Belgilangan 90 kunlik limitdan oshib ketganlar qo‘lga olingan va mamlakatni tark etishlari to‘g‘risida ogohlantirilgan.
Faqat press-reliz oxiridagina chegaradagi vaziyat Rossiya tomonidan sentyabr oyidan beri «yashirin import»ni aniqlash bo‘yicha o‘tkazilayotgan reydlar boshlangani tufayli keskinlashgani aytilgan. «Qo‘shimcha tekshiruvlar o‘tkazilishi munosabati bilan ayrim nazorat-o‘tkazish punktlarida yuk avtomashinalarini ko‘rikdan o‘tkazish vaqti ko‘paydi», — deyiladi matbuot xizmati xabarida.
Rossiya-Qozog‘iston chegarasida yuk mashinalari tirbandligi bilan bog‘liq vaziyat sentyabr oyidan beri og‘irligicha qolmoqda. Rasman ikki davlat rasmiylari og‘ir yuk tashuvchi yuk mashinalari chegaradan o‘tishda hech qanday muammoga duch kelmayotganini da’vo qilmoqda. Biroq, Qozog‘iston OAVlari Rossiya tomoni tekshiruvlarni kuchaytirishidan qo‘rqib, Qozog‘istonda ayrim yuk mashinalari turib qolayotganini yozmoqda. Oktyabr oyi boshida RF Federal bojxona xizmati chegara yaqinida «transport vositalarini tanlagan holda ko‘rikdan o‘tkazuvchi» «mobil guruhlar» faoliyat yuritayotgani haqida ma’lum qildi.
«Ushbu chora-tadbirlar importning «yashirin» sxemalariga qarshi kurashishga qaratilgan. Aksariyat hollarda iste’mol tovarlari sifatsiz bo‘lib, ulardan foydalanish iste’molchilar hayoti va sog‘lig‘iga bevosita tahdid solishi mumkin», — deyiladi bojxona xizmati xabarida.
