Oltinbek Risbekov. kabar.kg sayti fotosurati
Qirg‘izistonda kelayotgan isitish mavsumida elektr energiyasini rejali ravishda navbatma-navbat o‘chirishlar bo‘lmaydi. Bu haqda Energetika vaziri Oltinbek Risbekov ma’lum qildi, deya xabar beradi «Kabar» nashri.
Vazirning so‘zlariga ko‘ra, qishga tayyorgarlik jarayonida hukumat aholini elektr energiyasi bilan to‘liq ta’minlash uchun barcha choralarni ko‘rmoqda. Shu bilan birga, Risbekov elektr tarmoqlarida avariyaviy uzilishlar bo‘lishi mumkinligini istisno qilmadi. Biroq, ularni tezkor bartaraf etish uchun maxsus brigadalar tayyorlangan va kuchaytirilgan ish rejimiga o‘tkazilgan.
Vazir mamlakatda har kuni elektr energiyasidan tejamkor foydalanish va belgilangan iste’mol limitlariga rioya etilishini nazorat qilish ishlari olib borilayotganini aytdi. Natijada aprel–may oylarida umumiy iste’mol rejalashtirilgan ko‘rsatkichlardan 91,8 mln kVt·soatga, ya’ni 4,3 foizga kam bo‘lgan.
Yanvar–may oylari yakunlariga ko‘ra, Qirg‘izistonda elektr energiyasi ishlab chiqarish hajmi o‘tgan yilning shu davriga nisbatan oshgan. Umumiy ishlab chiqarish 6,2 mlrd kilovatt-soatni tashkil etgan yoki rejaning 105 foizi bajarilgan. Elektr energiyasining asosiy qismi gidroelektr stansiyalar (GES) tomonidan ishlab chiqarilgan — ular 4,6 mlrd kVt·soatdan ortiq elektr energiyasi yetkazib bergan. Bishkek issiqlik elektr markazida (IEM) esa 1,1 mlrd kVt·soatdan ziyod elektr energiyasi ishlab chiqarilib, reja 103 foizga bajarilgan. Bundan tashqari, kichik GESlar 73 mln kVt·soat elektr energiyasi ishlab chiqargan va ular ham belgilangan ko‘rsatkichlardan yuqori natija qayd etgan.
Qirg‘iziston ichki zaxiralar bilan bir qatorda tashqi yetkazib berishlarga ham umid qilmoqda. 2026 yil uchun 4 mlrd 99 mln kVt·soat hajmida elektr energiyasi import qilish bo‘yicha kelishuvlar tuzilgan.
Risbekov ta’kidlashicha, kuz-qish davrini barqaror o‘tkazishning asosiy omili yoqilg‘i zaxiralari bo‘ladi. Respublikada 3,4 mln tonna ko‘mir zaxira qilish rejalashtirilgan. Uning asosiy qismi — 1,5 mln tonnasi Bishkek issiqlik elektr markazi (IEM) uchun mo‘ljallangan. Bu hajmga import qilinadigan va mahalliy yuqori kaloriyali ko‘mir navlari ham kiradi. Aholi uchun 1,48 mln tonna, budjet muassasalari uchun esa 319 ming tonna ko‘mir yetkazib beriladi.
Bundan tashqari, mamlakat bo‘yicha 45,5 ming tonna mazut zaxira qilinadi. U Bishkek va O‘shdagi issiqlik ta’minoti obyektlariga, shuningdek, munitsipal issiqlik tarmoqlariga yo‘naltiriladi.
Yonilg‘i-moylash materiallari yetkazib berish bo‘yicha muzokaralar ham davom etmoqda. Qirg‘iziston bu borada Belarus, Eron va Turkmaniston bilan muzokara olib bormoqda, O‘zbekistondan javoblar olingan, ammo tafsilotlar keltirilmagan.
