AQSH prezidenti Donald Tramp 60 ta davlatdan, jumladan Qozog‘istondan import qilinadigan tovarlarga nisbatan yangi bojlarni joriy etishni nazarda tutuvchi farmonni imzoladi, deb xabar beradi Reuters.
Oq uy hujjatiga ko‘ra, 2026 yil 24 iyuldan boshlab Qozog‘iston mahsulotlariga 12,5 foiz miqdorida tarif qo‘llaniladi.
Yangi choralar AQSH Savdo vakili idorasi (USTR) tomonidan o‘tkazilgan tekshiruv natijasida qabul qilingan.
Amerika rasmiylari ayrim davlatlar majburiy mehnatdan foydalangan holda ishlab chiqarilgan tovarlar importiga qo‘yilgan taqiqqa rioya etilishini yetarlicha samarali ta’minlamayapti, degan xulosaga kelgan.
Yangi cheklovlar tatbiq etiladigan davlatlar ro‘yxatiga Qozog‘istondan tashqari Rossiya, Xitoy, Turkiya, Shveysariya, Birlashgan Arab Amirliklari, Buyuk Britaniya, shuningdek Lotin Amerikasi va Osiyoning bir qator mamlakatlari kiritilgan. Sobiq sovet hududidagi davlatlar orasida ro‘yxatdan faqat Qozog‘iston va Rossiya joy olgan.
Ayrim davlatlar, jumladan Argentina, Hindiston, Indoneziya, Malayziya, Meksika va Buyuk Britaniya uchun 10 foizlik boj belgilagan. AQSH bahosiga ko‘ra, bu mamlakatlar majburiy mehnatdan foydalanib ishlab chiqarilgan mahsulotlar importini taqiqlagan, ammo ushbu taqiqqa rioya etilishini nazorat qilishni yetarlicha samarali yo‘lga qo‘ymagan.
Shu bilan birga, farmonda istisnolar ham ko‘zda tutilgan. Import cheklanishi AQSHda tanqislikka olib kelishi mumkin bo‘lgan xom ashyolarga, iqtisodiy uzilishlarni keltirib chiqarishi mumkin bo‘lgan tovarlarga, shuningdek Amerika hududida yetarli miqdorda ishlab chiqarish imkoni bo‘lmagan mahsulotlarga bojlar tatbiq etilmaydi. Bu esa Qozog‘istonning AQSHga eksportidagi ayrim asosiy tovarlar yangi tarif ta’siriga tushmasligini anglatadi.
Yangi bojlar 2026 yil fevral oyidan amal qilib kelgan vaqtinchalik 10 foizlik umumiy tarif o‘rnini bosadi.
2025 yilda Qozog‘iston va AQSH o‘rtasidagi tovar aylanmasi 3,2 milliard dollarni tashkil etgan. Qozog‘istonning AQSHga eksporti asosini xom neft, uran, kumush, ferroqotishmalar va boshqa mahsulotlar tashkil qiladi. Ushbu toifalar AQSH prezidentining «AQSH tovarlar savdosidagi jiddiy va barqaror taqchillikka olib keluvchi savdo amaliyotlarini bartaraf etish maqsadida o‘zaro tariflar orqali importni tartibga solish to‘g‘risida»gi farmonida belgilangan istisnolar ro‘yxatiga kiritilgan.
