«Andijon» FK fotosurati
Turkiyaning DİLAHAN TURİZM kompaniyasi Antaliyada «Andijon» futbol klubi uchun uchta o‘quv-mashg‘ulot yig‘inini tashkil etish bo‘yicha qarzdorlik sababli yaqin kunlarda klub ustidan sudga da’vo kiritishni rejalashtirmoqda. Tegishli xat nusxasi «Farg‘ona» tahririyatiga kelib tushgan.
Turkiya tomoni asosiy qarz miqdorini 69 922 yevro deb baholamoqda. Bundan tashqari, kompaniya to‘lovlarni kechiktirganlik uchun penya hisoblagan bo‘lib, 11 avgust holatiga uning miqdori 12 642 yevroni tashkil etgan. Shu tariqa, ushbu sanada talablarning umumiy summasi 82 564 yevroga yetgan. Penya hisoblanishi davom etmoqda.
Nizo 2026 yilgi mavsum boshlanishidan oldin kompaniya tomonidan Turkiyada «Andijon» klubi uchun tashkil etilgan uchta o‘quv-mashg‘ulot yig‘ini bilan bog‘liq.
Uchta yig‘in bo‘yicha xizmatlarning umumiy qiymati 280 141 yevroni tashkil etgan. «Farg‘ona» avvalroq kompaniya ma’lumotlariga tayanib xabar berganidek, klub 210 219 yevroni to‘lagan, qolgan 69 922 yevro esa hanuzgacha to‘lanmagan.
Shartnomalar shartlariga ko‘ra, to‘lovni kechiktirganlik uchun har bir kechiktirilgan kunga qarz summasining 0,1 foizi miqdorida penya belgilangan.
DİLAHAN TURİZM sudgacha bo‘lgan talabnomada asosiy qarzni to‘lash va 15–20 avgust kunlari oralig‘ida hisoblangan penyani qoplashni talab qilgan. Kompaniya vakili «Farg‘ona»ga ma’lum qilishicha, qarz to‘lanmagan va endi Turkiya tomoni yaqin kunlarda sudga da’vo kiritishni rejalashtirmoqda.
Keltirilgan summalar va holatlar sudgacha bo‘lgan talabnoma DİLAHAN TURİZM kompaniyasining pozitsiyasiga asoslangan. Qarzdorlikning mavjudligi va miqdori sud tomonidan hozircha aniqlanmagan. Kompaniya, shuningdek, sud xarajatlari va yuridik xizmatlar uchun sarflangan mablag‘larni qoplashni ham talab qilmoqchi, talabnomada ushbu xarajatlar 2,8 ming yevro deb baholangan.
«Andijon» futbol klubi qarzdorlik yuzasidan hozircha izoh bermadi.
