O‘zbekiston-Yaponiya o‘yinidan lavha. O‘FA fotosurati
O‘zbekiston U-23 terma jamoasi 2026 yilgi Osiyo o‘yinlarining Aychi — Nagoyada o‘tkazilayotgan futbol turniri yarim finalida Yaponiyaga mag‘lub bo‘ldi. Asosiy va qo‘shimcha vaqt 1:1 hisobida yakunlandi, penaltilar seriyasida esa mezbonlar 9:8 hisobida g‘alaba qozondi.
O‘zbekiston 8-daqiqadayoq hisobni ochdi. Golni Sardorbek Bahromov kiritdi. Ravshan Haydarov shogirdlari asosiy vaqtning deyarli oxiriga qadar ustunlikni saqlab qoldi, ammo 88-daqiqada Sena Ishibashi hisobni tenglashtirdi. Qo‘shimcha vaqtda jamoalar gol ura olmadi.
Penaltilar seriyasida raqiblar o‘ninchi bosqichgacha yetib bordi. O‘zbekistonlik futbolchi Quvonchbek Xushvaktovning hal qiluvchi zarbasi to‘singa tegdi. Shundan so‘ng Yaponiya finalga yo‘llanma oldi.
Ta’kidlash joiz, O‘zbekiston terma jamoasi «katta yoshdagi» futbolchilar uchun ajratilgan kvotalardan foydalanmadi va Osiyo o‘yinlariga U-21 tarkibi bilan bordi. Turnir navbatdagi yozgi Olimpiada o‘yinlariga tayyorgarlik sifatida qabul qilinmoqda. Yaponiya ham xuddi shu tamoyil asosida harakat qilmoqda.
Uchinchi o‘rin uchun bahsda O‘zbekiston Janubiy Koreyaga 1:2 hisobida mag‘lub bo‘lgan Xitoy terma jamoasi bilan o‘ynaydi. Xitoyliklar 22-daqiqada Van Yudunning goli evaziga hisobni ochdi, ammo 33-daqiqada Li Yon Jun hisobni tenglashtirdi. 82-daqiqada esa Pe Chun Xo koreyslarga g‘alaba keltirgan golni urdi.
O‘zbekiston — Xitoy uchrashuvi bronza medallari uchun 3 oktyabr kuni bo‘lib o‘tadi.
O‘zbekiston Osiyo o‘yinlarida ketma-ket ikkinchi marta bronza medalini qo‘lga kiritishga harakat qiladi. Xanchjouda bo‘lib o‘tgan avvalgi turnirda jamoa yarim finalda Janubiy Koreyaga 1:2 hisobida mag‘lub bo‘lgan, shundan so‘ng uchinchi o‘rin uchun bahsda Gonkongni 4:0 hisobida yirik mag‘lubiyatga uchratgandi.
1 oktyabr holatiga ko‘ra, O‘zbekiston terma jamoasi Osiyo o‘yinlarining umumjamoa medallar jadvalida to‘rtinchi o‘rinni egallab turibdi. O‘zbekistonlik sportchilar hisobida 54 ta medal bor: 16 ta oltin, 19 ta kumush va 19 ta bronza. Faqat musobaqalarning 11-kunida jamoa 9 ta medalga ega chiqdi: 2 ta oltin, 2 ta kumush va 5 ta bronza.
