Yan Sanders Islom sivilizatsiyasi markazida. ITSM fotosurati
Jahon bojxona tashkiloti Bosh kotibi Yan Sanders O‘zbekistondagi Islom sivilizatsiyasi markazini «chin ma’noda noyob majmua» deb atadi. Uning ta’kidlashicha, markaz Markaziy Osiyo tarixini hamda O‘zbekistonning taraqqiyot yo‘lini XXI asrgacha kuzatish imkonini beradi.
Sanders O‘zbekistonga tashrifi davomida Markazga bordi. Delegatsiyaga mintaqaning tarixi, islom sivilizatsiyasining ilmiy va madaniy merosi, shuningdek, mamlakat taraqqiyotining zamonaviy bosqichiga bag‘ishlangan asosiy ekspozitsiyalar taqdim etildi.
Mehmonlar raqamli texnologiyalardan foydalanishga alohida e’tibor qaratdilar. Jumladan, Sandersga olim Abu Ali ibn Sinoning interaktiv raqamli qiyofasi namoyish etildi. U bilan tashrif buyuruvchilar «muloqot qilishlari» mumkin.
Jahon bojxona tashkiloti rahbarining so‘zlariga ko‘ra, Markaz ekspozitsiyalari nafaqat Markaziy Osiyoning o‘tmishi, balki O‘zbekistonning zamonaviy islom olamidagi o‘rni haqida ham yaxlit tasavvur hosil qilish imkonini beradi.
«Mintaqa haqida yetarlicha bilimga ega bo‘lmagan inson uchun Markaz dunyoning ushbu qismi tarixini eng qadimgi davrlardan bugungi kunga qadar izchil o‘rganish imkonini beradi. Ekspozitsiyaning yakuniy qismida mamlakatning kelajagi va uning XXI asrdagi taraqqiyoti haqidagi qarashlar aks ettirilgan», — dedi Sanders.
U, shuningdek, ekspozitsiyalarni tashkil etish darajasi va taqdim etilgan ma’lumotlar ko‘lami yuqori ekanini ta’kidladi.
«Bu O‘zbekistonning boy tarixi va madaniyati, uning jahon sivilizatsiyasidagi roli haqida ko‘plab yangi ma’lumotlarga ega bo‘lish mumkin bo‘lgan noyob maskandir», — deya ta’kidladi Jahon bojxona tashkiloti Bosh kotibi.
Sanders Markazning tashkil etilishini O‘zbekiston prezidenti Shavkat Mirziyoyevning mamlakat tarixiy va madaniy merosini asrash hamda ommalashtirishga qaratilgan siyosati bilan alohida bog‘ladi.
Jahon bojxona tashkiloti rahbari o‘z taassurotlarini faxriy mehmonlar kitobida ham qoldirdi. U Markazga tashrif buyurishi unga «Markaziy Osiyo tarixini, uning islom olamidagi o‘rni va O‘zbekistonning XXI asrdagi taraqqiyot yo‘lini chuqurroq anglash» imkonini berganini yozdi.
ℹ️ Islom sivilizatsiyasi markazi Xasti-Imom majmuasi yonida qurildi. Inshoot qadimgi me’moriy obidalar shaklida bunyod etildi. Majmuaning to‘rt tomonida balandligi 34 metrli peshtoqlar, o‘rtada 65 metrli gumbaz qurilgan. Bu yerda Qur’on zali, 550 o‘rinli anjumanlar zali va muzey mavjud bo‘lib, ko‘rgazmalar O‘zbekistonning islomgacha bo‘lgan davrdan to hozirgi kungacha bo‘lgan butun tarixini qamrab oladi. ITSM O‘zbekiston xalqaro islomshunoslik akademiyasi va dunyoning ixtisoslashtirilgan ilmiy-ta’lim markazlari bilan hamkorlikda ajdodlar merosini o‘rganish, idrok etish borasida ma’rifiy maskanga aylanishi ko‘zda tutilgan.
